ចៅហ្វាយក្រុងថ្មីបង្ហាញពីការប្រឈមនានានៅភ្នំពេញ
Cambodia News
ភ្នំពេញ៖ លោកអភិបាលរាជធានីភ្នំពេញដែលទើបតែងតាំងថ្មីបានបង្ហាញពីការប្រឈមមួយចំនួននៅពេលបច្ចុប្បន្ន ហើយទាមទារឲ្យមានការចូលរួមទាំងអស់គ្នា ដោយរួមទាំងអ្នកសារព័ត៌មានផងជួយដោះស្រាយ។
នៅក្នុងពិធីបាយល្ងាចមួយនៅឯសណ្ឋាគារកាំបូឌីយ៉ាណា ដែលរៀបចំឡើងដោយមូលនិធិខុនរ៉ាដអាដេណៅអ៊ែរប្រចាំតំបន់ កាលពីល្ងាចថ្ងៃទី ២៩ មេសា ឆ្នាំ ២០១៣ នេះ លោក ប៉ា សុជាតិវង្ស បានលើកឡើងថា បើទោះជារាជធានីភ្នំពេញមើលនឹងភ្នែកផ្ទាល់ឃើញថា មានការរីកចម្រើន និងអភិវឌ្ឍន៍មែន តែបើសំឡឹងមើលឲ្យជ្រៅទៅទើបដឹងថា រាជធានីនៅមានបញ្ហាលំបាកជាច្រើនទៀត។
នៅចំពោះមុខអ្នកកាសែតបរទេសមកពី២២ ប្រទេស និងអ្នកកាសែតជារតិជាច្រើនរូបទៀត លោក ប៉ា សុជាតិវង្ស្ល បាននិយាយថា រាជធានីភ្នំពេញមានប្រជាជន ចុះបញ្ជីជាផ្លូវការប្រមាណ១,៥ លាននាក់ តែតាមពិតអាចមានដល់ទៅ ២,៥ លាននាក់ ព្រោះមានកម្មករចេញចូលដោយមិនបានចុះបញ្ជី។
លោកបានបញ្ជាក់ថា នៅរាជថានីនៅមានបទឧក្រិដ្ឋជាច្រើន ដូចជាគ្រឿងញៀន ការចាប់រំលោភ និងការជួញដូរ ដែលឧក្រិដ្ឋជនមានទាំងជនជាតិខ្មែរនិងជនជាតិបរទេស ហើយការបង្រ្កាបឧក្រិដ្ឋជនបរទេសពេលខ្លះក៏នាំឲ្យមានការប៉ះពាល់ចំណងមិត្តភាពរវាងរដ្ឋ និងរដ្ឋផងដែរ។
លោកបានបន្តថា ខណៈដែលអត្រាប្រជាជនកើនឡើង រាជធានីនៅខ្វះមធ្យោបាយធ្វើដំណើរសាធារណៈ សាវាសាធារណៈផ្សេងៗទៀតនៅទន់ខ្សោយ មានបញ្ហាប្រព័ន្ធលូទឹក ហើយដោយសារតំបន់ភូមិសាស្រ្ត រាជធានីតែងតែមានទឹកជំនន់ ដែលនាំឲ្យមានការលំបាក។
ទោះបីជាយ៉ាងនេះក៏ដោយ លោកបានសំដែងមោទនភាពចំពោះរាជធានីដែលតំណាងឲ្យប្រទេសដែលបានចូលរួមប្រកួតប្រជែងលើភិភពលោកទទួលបានចំណាត់ថ្នាក់ បានរៀបចំសន្និសីទថ្នាក់តំបន់និងថ្នាក់អន្តរជាតិបានជោគជ័យ ដោយមិនមានបញ្ហាភេវរកម្ម ដូចនៅបណ្តាប្រទេសធំៗមួយចំនួនឡើយ។
លោកបានបង្ហើបឲ្យដឹងថា នៅពេលខាងមុខនេះ អង្គការបិតិកភ័ណ្ឌពិភពលោកនឹងរៀបចំសន្និសីទធំមួយនៅរាជធានីភ្នំពេញ ដែលមោទនភាពរបស់ជាតិកម្ពុជាទាំងមូល៕
