ស្ត្រីជាប្រពន្ធថា ប្តីលួចយកកូនទៅលក់ បង្គ្រប់លុយទិញម៉ូតូ
សារព័ត៌មាន Cambodia News/
អត្ថបទ៖ ហេង នាង
ភ្នំពេញ៖ កាលពីវេលាម៉ោង ៩ និង៣០នាទី ព្រឹកថ្ងៃទី២៣ មីនា នេះ មានស្ត្រីម្នាក់បានអង្គុយយំសោកនៅខាងមុខផ្ទះនៅចំណុចភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ដោយសារតែបាត់កូនស្រីរបស់ខ្លួន ក្រោយពីសង្ស័យថាបុរសជាប្តីយកកូនទៅលក់ដើម្បីបង្គ្រប់លុយទិញម៉ូតូថ្មី។
ប្រភពព័ត៌មានពីសមត្ថកិច្ចបានឲ្យដឹងថា ស្ត្រីខាងលើមានឈ្មោះ ឈូន ស្រីម៉ាច អាយុ២២ឆ្នាំ មុខរបរបម្រើការនៅហាងខារ៉ាអូខេ មានស្រុកកំណើតភូមិទំពាំងឬស្សី ស្រុកអូរាំងឪ ខេត្តកំពង់ចាម ចំណែកបុរសជាប្តីដែលយកកូនទៅបាត់នោះ ឈ្មោះ ផល វណ្ណៈ អាយុ២២ឆ្នាំ រីឯកូនស្រីដែលបាត់ខ្លួនមានឈ្មោះ និត សិយ៉ា អាយុទើបតែ៩ខែប៉ុណ្ណោះ។
បើតាមការអះអាងពីសំណាក់ស្ត្រីរូបនោះ បានរៀបរាប់ថា មុនពេលកើតហេតុប៉ុន្មានថ្ងៃប្តីរបស់នាងតែងត្អូញថា ចង់យកកូនទៅលក់ឲ្យគេ ដើម្បីបង្គ្រប់លុយទិញម៉ូតូ លុះបន្តិចក្រោយមកស្រាប់តែប្តីរបស់នាង ទូរស័ព្ទមកប្រាប់ថា កាត់ចិត្តទៅ កូនរបស់យើងបានឲ្យទៅអ្នកមានចិញ្ចឹមហើយ។
បើតាមប្រភពពីប្រជាពលរដ្ឋដែលរស់នៅក្បែរនោះ បានឲ្យដឹងថា នៅមុនពេលកើតហេតុ គេឃើញបុរសជាប្តីរបស់នារីរងគ្រោះ ជិះម៉ូតូថ្មី១គ្រឿងម៉ាក ស្កុបពី ពណ៌ខ្មៅ ពាក់ស្លាកលេខ នគរបាល បានមកឈប់មុខផ្ទះ១សន្ទុះ ហើយក៏ជិះចេញទៅបាត់តែម្តង៕
