រដ្ឋាភិបាល ថា ប្រាក់ឈ្នួលកម្មកររោងចក្រ នឹងត្រូវដំឡើងនៅឆ្នាំ២០១៥
សារព័ត៌មាន Cambodia News/
ភ្នំពេញ (២៥ កញ្ញា ២០១៤ ) ៖ ក្នុងពិធីចែកសញ្ញាបត្រដល់និស្សិតសាកលវិទ្យាល័យចំរើនពហុបច្ចេកវិទ្យានៅកោះពេជ្រ ព្រឹកថ្ងៃទី២៥ខែកញ្ញានេះ លោកនាយករដ្ឋមន្ត្រីថ្លែងថា ការដំឡើងប្រាក់ឈ្នួលដល់កម្មករ នឹងត្រូវដំឡើងនៅឆ្នាំ២០១៥ខាងមុខ តែមិនទាន់ដឹងថាអាចនឹងត្រូវដំឡើងដល់ប៉ុន្មាននោះទេ ដោយសារភាគីអង្គការអន្តរជាតិខាងពលកម្ម(ILO) ក្រសួងការងារ និងនិយោជិត កំពុងតែពិភាក្សាគ្នា។
ប្រាក់ខែកម្មកររោងចក្រកាត់ដេរ មានចំនួន១០០ដុល្លារ ដែលទើបត្រូវបានដំឡើងជាបន្តបន្ទាប់កាលពីចុងឆ្នាំ២០១៣ និងកាលពីដើមខែមករា។ប៉ុន្តែសហជីពធំៗដែលតំណាងឲ្យកម្មករប្រកាសបន្តយុទ្ធនាការ និងការតវ៉ាទាមទារប្រាក់ឈ្នួលរហូតដល់១៧៧ដុល្លារ។
កាលពីថ្ងៃទី១៧ខែកញ្ញា ក្រសួងការងារ ភាគីសហជីព និងក្រុមនិយោជក បានជួបគ្នាពិភាក្សាពីការដំឡើងប្រាក់ឈ្នួល តែមិនទាន់សម្រេចជារួមលើចំនួនប្រាក់ដែលត្រូវដំឡើងនៅឡើយទេ។ភាគីទាំងបី គ្រោងនឹងជួបគ្នាបន្តទៀតនៅថ្ងៃទី២៦ខែកញ្ញាស្អែកនេះ៕
