ទិដ្ឋភាពនៅក្នុងព្រះរាជពិធីថ្វាយព្រះរាជបរមងារថ្វាយព្រះមហាក្សត្រ
សារព័ត៌មាន Cambodia News/
ភ្នំពេញ (០៣ មិថុនា ២០១៥) ៖ ព្រះរាជពិធីថ្វាយព្រះរាជបរមងារ “ព្រះស្រីលោកធម្មិករាជ” ថ្វាយព្រះ មហាក្សត្រ កម្ពុជា បានរៀបចំធ្វើតាំងពីព្រឹកព្រលឹមថ្ងៃទី០៣មិថុនា រហូតមកដល់ពេលនេះ បានបិទបញ្ចប់ហើយ។
នៅវេលាម៉ោង៩ព្រឹក ថ្ងៃដដែលនោះ នៅបរិវេណមុខព្រះបរមរាជវាំង មានព្រះរាជពិធីរាប់បាតព្រះសង្ឃ១ម៉ឺនអង្គ។ ព្រះសង្ឃ១ម៉ឺនអង្គនិមន្តមកពីបណ្តាវត្តអារាមក្នុងរាជធានី និងតាមបណ្តាខេត្ត ដើម្បីបំពេញព្រះរាជកុសល។
ចំពោះព្រះសង្ឃ ដែលមកចូលរួមក្នុងពិធីថ្វាយព្រះរាជបរមងារកិត្តិយស “ព្រះស្រីលោកធម្មិករាជ” ថ្វាយព្រះមហាក្សត្រ មកពីប្រទេសជប៉ុន ម៉ុងហ្គោលី និងប្រទេសសឹង្ហបុរី។ព្រះរាជបរមងារកិត្តិយស “ព្រះស្រីលោកធម្មិករាជ” ថ្នាក់អន្តរជាតិនេះ ត្រូវបានបង្កើតឡើង នៅក្នុងពិធីប្រជុំព្រះពុទ្ធសាសនា លើពិភពលោក នៅប្រទេសជប៉ុន កាលពីខែធ្នូ ឆ្នាំ២០១៤។
សូមជម្រាបដែរថា ពិធីរាប់បាតព្រះសង្ឃទាំង១ម៉ឺនអង្គនេះ គឺដើម្បីអបអរព្រះរាជពិធីដង្ហែគោរមងារជា «ព្រះស្រីលោកធម្មិករាជ» ថ្វាយព្រះករុណា ព្រះបាទ សម្តេចព្រះបរមនាថ នរោត្តម សហមុនី ព្រះមហាក្សត្រនៃប្រទេសកម្ពុជា ក្រៅពីការារាប់បាតព្រះសង្ឃ១ម៉ឺនអង្គ នៅក្នុងពិធីនេះ ក៏មានពិធីសាសនាជាច្រើនទៀត៕
