កងទ័ពអាកាសអ៊ីរ៉ាក់បានវាយប្រហារលើក្បួនរថយន្តរដ្ឋអ៊ីស្លាម
សារព័ត៌មាន Cambodia News/
អ៊ីរ៉ាក់ (១៨ កក្កដា ២០១៦) ៖ មន្ត្រីក្រសួងការពារជាតិអ៊ីរ៉ាក់ឲ្យដឹងកាលពីថ្ងៃអាទិត្យម្សិលមិញថា យន្តហោះចម្បាំងជាច្រើនគ្រោះរបស់អ៊ីរ៉ាក់ បានវាយប្រហារបំផ្លាញក្បួនរថយន្តរដ្ឋអ៊ីស្លាមនៅ តំបន់ភាគខាងត្បូងទីក្រុងម៉ូសូល។
សេចក្តីរាយការណ៍បន្តថា ការវាយប្រហារពីអាកាសនេះធ្វើឡើងនៅតំបន់វាលខ្សាច់ ក្បែរទីក្រុងកាយ៉ារ៉ាមានចម្ងាយជាង ៦០គីឡូម៉ែត្រភាគខាងត្បូងតំបន់ម៉ូស៊ូល ជា ទីក្រុងស្ថិតក្រោមការកាន់កាប់ត្រួតត្រាដោយក្រុមសកម្មប្រយុទ្ធជីហាតបច្ចុប្បន្ន។
មន្ត្រីក្រសួងនេះបន្តថា ក្បួនរថយន្តរដ្ឋអ៊ីស្លាមបានបើកបររត់គេចចេញពីទីក្រុងនេះ ដែលជាទីកន្លែងមានមូលដ្ឋានរឹងមាំរបស់ក្រុមសកម្មប្រយុទ្ធនៅភាគ កណ្ដាលប្រទេសអ៊ីរ៉ាក់។
ក្នុងការវាយប្រហារប៉ុន្មានសប្ដាហ៍នាពេលចុងក្រោយនេះ កងទ័ពអ៊ីរ៉ាក់បានដណ្ដើមយកភូមិជាច្រើនវិញ ពីក្រុមរដ្ឋអ៊ីស្លាមក្នុងពេលវាយសម្រុកទៅមុខ ដើម្បីចូលទីក្រុងម៉ូស៊ូល។ ជោគជ័យដ៏សំខាន់មួយគឺការរឹបអូសកាន់កាប់ប្រលានយន្តហោះយោធានៅទីក្រុងកាយ៉ារ៉ាដែលគេសង្ឃឹមថា ត្រូវប្រើប្រាស់ទីនេះជាទីយុទ្ធសាស្ត្រវិការដ្ឋាន ជាដំណាក់កាលក្នុងការវាយប្រហារប្រឆាំងទៅលើទីក្រុង ឬតំបន់នានាមានក្រុមសកម្មប្រយុទ្ធរដ្ឋអ៊ីស្លាម៕
