លោក ជា ស៊ីម និងលោក សម រង្ស៊ី មិនមានឈ្មោះជាតំណាងរាស្ត្រសម្រាប់នីតិកាលទី៥នេះ
ភ្នំពេញ៖ យោងតាមបញ្ជីឈ្មោះតំណាងរាស្ត្រជាប់ឆ្នោត ចេញផ្សាយដោយ គជប កាលពីថ្ងៃទី៨ ខែកញ្ញា បានឲ្យដឹងថា ប្រធានគណបក្សប្រជាជនកម្ពុជា និងគណបក្សសង្គ្រោះជាតិ មិនមានឈ្មោះជាបេក្ខជនជាប់ជាតំណាងរាស្ត្រ សម្រាប់នីតិកាលទី៥នេះទេ។
តាមការផ្ទៀងផ្ទាត់ជាមួយបញ្ជីឈ្មោះ មានការផ្លាស់ប្តូរលោក ជា ស៊ីម ពីតំណាងរាស្ត្រ បើទោះបីជាលោកឈរនៅលំដាប់ទី១នៃបញ្ជីឈ្មោះក៏ដោយ សម្រាប់មណ្ឌលរាជធានីភ្នំពេញ ដែលមាន១២អាសនៈ។
គណបក្សប្រជាជនកម្ពុជា ទទួលបាន៥អាសនៈ ហើយគណបក្សសង្គ្រោះជាតិ ទទួលបាន៧អាសនៈ សម្រាប់មណ្ឌលនៅរាជធានីភ្នំពេញ។ គណបក្សប្រជាជនកម្ពុជា បានដាក់បញ្ចូលបេក្ខជនថ្មី១រូប សម្រាប់នីតិកាលទី៥នេះ គឺលោក កែប ជុតិមា អតីតអភិបាលរាជធានីភ្នំពេញ។ តំណាងរាស្ត្រទាំង៥នោះ រួមមាន លោក គាត ឈន់ លោក កែប ជុតិមា លោក ហ៊ូ ស្រ៊ី លោកស្រី គ្រួច សំអាន និងលោកស្រី ឡោក ខេង។
លោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនិតិសម្បទា និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ឈរនៅលំដាប់ទី៤ និងទី៥ សម្រាប់មណ្ឌលភ្នំពេញ ក៏ត្រូវបានផ្លាស់ប្តូរមិនឲ្យជាប់ជាតំណាងរាស្ត្រផងដែរ។
តំណាងរាស្ត្រមណ្ឌលព្រៃវែង លោក ជាម យៀប មានប្រសាសន៍ថា ការផ្លាស់ប្តូរបេក្ខភាពតំណាងរាស្ត្រ ជាប់ឆ្នោតរបស់គណបក្សប្រជាជនកម្ពុជា គឺផ្អែកលើតម្រូវការចាំបាច់របស់គណបក្ស ហើយមន្ត្រីដែលត្រូវផ្លាស់ចេញនោះ គណបក្សមិនបោះបង់ចោលនោះទេ ដោយនឹងមានការៀបចំតួនាទីថ្មី។
ចំណែកលោក សម រង្ស៊ី មិនបានឈរឈ្មោះជាតំណាងរាស្ត្រ ដោយសារ គជប សម្រេចមិនចុះឈ្មោះលោក ពេលលោកមានជាប់ពិរុទ្ធរឿងដកតម្រុយបង្គោលព្រំដែន។ នៅពេលលោកត្រឡប់មកវិញ គជប លើកឡើងថា វាយឺតពេលទៅហើយ ដោយសារការបោះឆ្នោត ខិតជិតមកដល់។
គជប បានប្រកាសជាផ្លូវការថា គណបក្សប្រជាជនកម្ពុជា ទទួលបាន៦៨អាសនៈ ប្រហែលជា៤៨.៨ភាគរយនៃអ្នកចូលរួមបោះឆ្នោតសរុប៦.៦៣លាននាក់ ហើយគណបក្សសង្គ្រោះជាតិ ទទួលបាន៥៥អាសនៈ ស្មើនឹង៤៤.៥ភាគរយ គឺ២.៩២ លានសំឡេង។ គណបក្សប្រជាជនកម្ពុជា បានបាត់បង់តំណាងរាស្ត្រចំនួន២២រូប បើប្រៀបធៀបពីការបោះឆ្នោតអាណត្តិកាលពី២០០៨ ដែលទទួលបាន៩០អាសនៈ៕ Cambodia News
