បក្សប្រឆាំងដើរចេញពីសវនាការនៅក្រុមប្រឹក្សាធម្មនុញ្ញ
ភ្នំពេញ៖ កាលពីព្រឹកថ្ងៃទី០៦ ខែកញ្ញា នេះ ក្រុមប្រឹក្សាធម្មនុញ្ញ បានបើកសវនាការជាសាធារណៈលើបណ្តឹងបដិសេធលទ្ធផលបោះឆ្នោត របស់គណបក្សសង្គ្រោះជាតិ នៅខេត្តកណ្តាល ដែលជាបណ្តឹងចុងក្រោយរបស់គណបក្សប្រឆាំងនេះ ខណៈពេលបក្សប្រឆាំងត្រៀមខ្លួនរួចជាស្រេចហើយ ក្នុងការធ្វើមហាបាតុកម្មនៅថ្ងៃសៅរ៍ ស្អែកនេះ។
នៅក្នុងសវនាការនេះ តំណាងគណបក្សប្រឆាំងបានសម្រេចដើរចេញ ពីសវនាការ ដោយបានធ្វើការអះអាងថា មិនមានជំនឿលើក្រុមប្រឹក្សាធម្មនុញ្ញ ដែលនឹងកាត់ក្តីផ្តល់យុត្តិធម៌ដល់គណបក្សសង្គ្រោះជាតិនោះឡើយ។
គូរបញ្ជាក់ថា គណបក្សសង្គ្រោះជាតិ បានដាក់ពាក្យបណ្តឹង ចំនួន ១៥ ទៅកាន់ក្រុមប្រឹក្សាធម្មនុញ្ញ ដើម្បីជំទាស់នឹងសេចក្តីសម្រេចរបស់ គ.ជ.ប។ ប៉ុន្តែ ស្ថាប័នកំពូលបិទផ្លូវតវ៉ាលើបណ្តឹងបោះឆ្នោតមួយនេះ បានសម្រេចដូចនឹង គ.ជ.ប ដែរ ដោយបានច្រានចោលបណ្តឹងរបស់គណបក្សសង្គ្រោះជាតិដែលប្តឹងសុំឲ្យមាន ការ ផ្ទៀងផ្ទាត់តួលេខនិងរាប់សន្លឹកឆ្នោតឡើងវិញ និងតម្កល់សេចក្តីសម្រេច គ.ជ.ប ទុកជាបានការទាំងអស់។
យោងតាមប្រក្រតិទិននៃការបោះឆ្នោត ក្រុមប្រឹក្សាធម្មនុញ្ញមានរយៈពេលតែ ២០ ថ្ងៃប៉ុណ្ណោះសម្រាប់ការដោះស្រាយ ភាពមិនប្រក្រតីនៃការបោះឆ្នោត មុននឹង គ.ជ.ប ប្រកាសលទ្ធផលបោះឆ្នោតជាផ្លូវការ នៅថ្ងៃអាទិត្យ ទី ០៨ ខែកញ្ញា ឆ្នាំ២០១៣នេះ។
ពោលគឺ សវនាការថ្ងៃនេះគឺជាថ្ងៃដោះស្រាយបណ្តឹងចុងក្រោយ បិទផ្លូវតវ៉ា ដែលគណបក្សសង្រ្គោះជាតិ ពុំមានហេតុផលផ្លូវច្បាប់ទៀតទេ ក្នុងការតវ៉ាប្រឆាំងនឹងលទ្ធផលបោះឆ្នោត កាលពីថ្ងៃទី ២៨ កក្កដា៕ Cambodia News
