កុមាររស់នៅក្នុងពន្ធនាគារជាមួយឪពុកម្ដាយ ៧៣នាក់ទទួលបានអាហារូបត្ថម្ភ
ដើម្បីសាទរទិវាកុមារអន្តរជាតិ ថ្ងៃ១មិថុនា អង្គការលីកាដូ បានបង្កើតកម្មវិធីជាមួយអង្គការដៃគូ ដើម្បីផ្ដល់អាហារូបត្ថម្ភដល់កុមារ ដែលរស់នៅក្នុងពន្ធនាគារជាមួយឪពុកម្ដាយ ១៤ ខេត្តក្រុងមានចំនួនសរុប ៧៣ នាក់។
ប្រធានអង្គការសិទ្ធិមនុស្សលីកាដូ លោកស្រីវេជ្ជបណ្ឌិត ពុង ឈីវកេក បាននិយាយថា តាមការអង្កេតរបស់អង្គការ បានរកឃើញកុមារចំនួន ៧៣នាក់ កំពុងរស់នៅពន្ធនាគារជាមួយម្ដាយ និងឪពុក ដែលកំពុងជាប់ពន្ធនាគារចំនួន ១៤ ខេត្តក្រុង។
ពន្ធនាគារ ដែលមានកុមាររស់នៅជាមួយឪពុកម្ដាយមាន ពន្ធនាគារតាខ្មៅ (ខេត្តកណ្ដាល) (ព្រៃស) កំពង់ចាម កំពង់ឆ្នាំង កំពង់សោម ពោធិសាត់ កោះកុង ស្វាយរៀង កំពត បន្ទាយមានជ័យ បាត់ដំបង កំពង់ស្ពឺ សៀមរាប និងកំពង់ធំ។
ចំពោះក្មេង ដែលរស់នៅជាមួយឪពុកម្ដាយក្នុងពន្ធនាគារ អនុញ្ញាតឲ្យនៅជាមួយតែ ៣ឆ្នាំទេ លើសពី ៣ឆ្នាំ អនុវត្តឲ្យទៅរស់នៅខាងក្រៅពន្ធនាគារជាមួយសាច់ញាតិ។ ពេលនោះកុមារ មានឱកាសទៅរៀនសូត្របាន។
អាហារូបត្ថម្ភដែលអង្គការលីកាដូ និងអង្គការដៃគូផ្តល់ឲ្យក្រុមកុមារទាំងនោះ រួមមានទឹកដោះគោ និងអាហារបំប៉នផ្សេងៗ ដល់ពួកគេ ដែលសកម្មភាពនេះមានយូរមកហើយ។ ការផ្តល់អាហារូបត្ថម្ភដល់កុមារ នៅក្នុងពន្ធនាគារនេះ ស្របពេលដែលពិភពលោក នឹងប្រារព្ធទិវាកុមារអន្តរជាតិ ថ្ងៃ១មិថុនា៕
