សៀវភៅ “ហ៊ុន សែន – នយោបាយ និងអំណាចក្នុងប្រវត្តិសាស្រ្តខ្មែរជាង៤០ឆ្នាំ” បានចេញផ្សាយជាសាធារណៈ
សារព័ត៌មាន Cambodia News/
ដោយ៖ ហេង នាង/
ភ្នំពេញ (០៤ មេសា ២០១៦) ៖ លោក ឆាយ សុផល អ្នកនិពន្ធសៀវភៅ និងជាសាស្រ្តាចារ្យព័ត៌មាននៅព្រឹកថ្ងៃទី៤ មេសា នេះ បានចេញផ្សាយសៀវភៅមួយទៀត ដែលមានចំណងជើងថា “ហ៊ុន សែន - នយោបាយ និងអំណាចក្នុងប្រវត្តិសាស្រ្តខ្មែរជាង៤០ឆ្នាំ” ដែលបានបង្ហាញពីអំណាចគ្រប់គ្រងជានាយករដ្ឋមន្រ្តីរបស់សម្តេចតេ ជោ ហ៊ុន សែន ក្នុងរយៈពេល៣១ឆ្នាំមកនេះ (៤ មេសា ១៩៨៥ - ៤ មេសា ២០១៦)។
ថ្លែងប្រាប់អ្នកសារព័ត៌មាននៅក្នុងសន្និសីទសារព័ត៌មាននៅឯក ទីស្នាក់ការក្លិបអ្នកកាសែតកម្ពុជា លោក ឆាយ សុផល បានលើកឡើងថា សៀវភៅនេះគឺជាឯកសារជំនួយស្មារតីផ្នែកនយោបាយក៏ដូចជាពីព្រឹត្តិកា រណ៍ប្រវត្តិសាស្រ្តជាច្រើនទៀត ព្រោះលោកបានរៀបរាប់ដោយសង្ខេបស្តីពីរបត់នយោបាយ យោធា សេដ្ឋកិច្ច និង បញ្ហាសង្គមមួយចំនួនទៀតដែលកើតមាននៅក្នុង ប្រវត្តិសាស្រ្តកម្ពុជានាអំឡុងពេលនៅចន្លោះមុនឆ្នាំ១៩៧០ រហូតមកដល់ពាក់កណ្តាលខែមីនា ឆ្នាំ២០១៦។
លោកបានបញ្ជាក់ ថា “ថ្វីបើសៀវភៅមានចំណងជើងធំៗសរសេរថា ហ៊ុន សែន ក៏ដោយ តែខ្លឹមសារដែលមានកម្រាស់ជិត៥០០ទំព័រនេះបានរៀបរាប់ពីនយោ បាយនិងអំណាចប្រទាក់ក្រឡាគ្នានៅក្នុងប្រវត្តិសាស្រ្តកម្ពុជាផងនិ ងពិភពលោកផង ដោយមានពាក់ព័ន្ធនឹងឥស្សរជនជាច្រើនទាំងខ្មែរនិងបរទេសដែលមា ននៅមុនឆ្នាំ១៩៧០ រហូតមកដល់ពាក់កណ្តាលខែមីនា ឆ្នាំ២០១៦ ក្នុងនោះក៏មានព្រះមហាក្សត្រ សម្តេចព្រះបរមនាថ នរោត្តម សីហមុនី សម្តេចព្រះបរមរតនកោដ្ឋ នរោត្តម សីហនុ សម្តេចក្រុមព្រះ នរោត្តម រណឫទ្ធិ ឯកឧត្តម សម រង្ស៊ី និងឯកឧត្តម កឹម សុខា ផងដែរ”។
លោក ឆាយ សុផល បានរៀបរាប់ថា នេះជាការចេញផ្សាយលើកទី២ ហើយមានចំណុចថ្មីៗជាច្រើន ព្រោះថា កាលពីពេលបោះពុម្ពលើកទីមួយគិតព្រឹត្តិការណ៍ត្រឹមឆ្នាំ២០១១ មានជាង៣០០ទំព័រ តែលើកទី២នេះគឺគិតព្រឹត្តិការណ៍រហូតមកដល់ពាក់កណ្តាលខែមីនាឆ្នាំ ២០១៦ មានដល់ទៅ៤៩៤ទំព័រ។
លោក ឆាយ សុផល បន្តថា នៅក្នុងភាពជាអ្នកដឹកនាំរដ្ឋាភិបាលក្នុងរយៈពេល៣១ឆ្នាំ មកនេះ សម្តេច ហ៊ុន សែន ពិតជាមានអ្នកគាំទ្រនិងអ្នកប្រឆាំង ដែលបញ្ហានេះមិនមែនចម្លែកទេនៅក្នុងសង្គមប្រជាធិបតេយ្យ។
គួរប ញ្ជាក់ថា នៅថ្ងៃទី៤ មេសា ១៩៧០ សម្តេចតេជោ ហ៊ុន សែន បានចូលរួមចលនាតស៊ូក្រោយមានការអំពាវនាវរបស់សម្តេច នរោត្តម សីហនុ ឲ្យជនរួមជាតិងើបឡើងប្រឆាំងពួកចក្រពត្តិអាម៉េរិក និងរដ្ឋាភិបាលដឹកនាំដោយលោក លន់ នល់ ហើយសម្តេចបានយកថ្ងៃទី៤ មេសា ជាថ្ងៃកំណើតផ្លូវការនៅក្នុងប្រវត្តិរូបរហូតមក តែថ្ងៃកំណើតរបស់លោកគឺថ្ងៃទី៥ សីហា១៩៥២។ បើគិតពីថ្ងៃទី៤ មេសា ១៩៧០ មកដល់ ថ្ងៃទី៤ មេសា ២០១៦ គឺសម្តេចតេជោបានបម្រើប្រទេសអស់រយៈពេល៤៦ឆ្នាំហើយ ក្នុងនោះជានាយករដ្ឋមន្រ្តីបាន៣១ឆ្នាំ។
មកដល់ពេលនេះ លោក ឆាយ សុផល បានចងក្រងសៀវភៅប្រវត្តិសាស្រ្តប្រមាណ៥ក្បាលហើយ ហើយនៅពេលដែលសួរថា តើការបោះពុម្ពសៀវភៅទទួលបានប្រាក់ចំណេញច្រើនទេ លោក សុផល បានឆ្លើយមួយៗថា “ជាការពិត គឺមិនទទួលកំរៃច្រើនធ្វើឲ្យជីវភាពធូរធានោះទេ តែធ្វើម៉េចបើនេះជាជំនាញរបស់ខ្ញុំ ហើយខ្ញុំស្រឡាញ់កិច្ចការនេះ និងបន្តធ្វើទៀត។ ខ្ញុំមានគម្រោងចេញសៀវភៅពីរទៀតនៅមុនឆ្នាំ២០១៨ខាងមុខនេះនេះ”៕
