ការក្រោកឡើងតវ៉ាបញ្ចេញមតិអាចនាំឲ្យមានការផ្លាស់ប្ដូរ
កាលពីថ្ងៃទី២៣ ឧសភា ២០១២ អង្គការលើកលែងទោសអន្តរជាតិ ( Amnesty International ) បានធ្វើការកត់សម្គាល់នៅក្នុងរបាយការណ៏របស់ខ្លួនមួយ ដែលគេផ្សព្វផ្សាយជាសាធារណៈ ថា ការក្រោកឡើងរបស់ប្រជាពលរដ្ឋតវ៉ាពីបញ្ហាដីធ្លី ក៏ដូចជាការប្រឆាំងចំពោះការជិះជាន់ពីសំណាក់ក្រុមហ៊ុនថៅកែរោងចក្រ បាននាំឲ្យមានការផ្លាស់ប្ដូរ។
នៅក្នុងរបាយការណ៏បានលើកឡើងថា ប្រជាពលរដ្ឋកម្ពុជា បានប្រឈមចំពោះបញ្ហាសិទ្ធិមនុស្សរបស់ខ្លួន តាមរយៈការដាក់កំហិតសេរីភាពបញ្ចេញមតិកាន់តែធ្ងន់ធ្ងរទៅៗហើយ ក្នុងនោះក៏មានសមាជិកនៃក្រុមអ្នកការពារសិទ្ធិមនុស្សខ្លះ ត្រូវទទួលរងការវាយដំលើរាង្គកាយ ការចាប់ខ្លួនផ្ដន្ទាទោស ដោយអាជ្ញាធរ ដោយសារតែសកម្មភាពតវ៉ារបស់ពួកគេដោយសន្តិវិធីរបស់ពួកគេ ។
លោករ៉ូភឺត អាបបូត ( Ropert Abbot) អ្នកស្រាវជ្រាវរបស់អង្គការនេះបាននិយាយថា ការតវ៉ា អាចនាំមកនូវការផ្លាស់ប្ដូរ ដូចជាករណីអ្នកបឹងកក់ ទីបំផុតត្រូវបានរដ្ឋាភិបាលផ្ដល់ដីទំហំ១២,៤៤ហិកតារ និងរោងចក្រមួយចំនួនបានធ្វើការឆ្លើយតប ទៅតាមសំណើទាមទាររបស់ក្រុមកម្មករ ដោយសារតែមានការតវ៉ារបស់ពួកគេ៕