យុវជនម្នាក់ជិះម៉ូតូបុកបុរសជនជាតិវៀតណាមម្នាក់ស្លាប់
ភ្នំពេញ ៖ កាលពីពេលវេលាម៉ោង៧និង៤៥នាទីព្រឹក ថ្ងៃទី២៥ ខែធ្នូ យុវជនម្នាក់បានជិះ ម៉ូតូបុក បុរសជនជាតិវៀតណាមម្នាក់ បណ្តាលឲ្យស្លាប់បាត់បង់ជីវិត ពេលបញ្ជូនទៅ សង្គ្រោះ នៅមន្ទីរពេទ្យ កាល់ម៉ែត រយៈពេល៦ម៉ោង ក្រោយ ស្ថិតនៅលើ ផ្លូវព្រះនរោត្ដម កែងផ្លូវលេខ២៤០ សង្កាត់ ចតុមុខ ខណ្ឌដូនពេញ។
មុនពេលកើតហេតុ យុវជនអ៊ឹង ផេងហួរ អាយុ១៦ឆ្នាំ រស់នៅ ផ្ទះលេខ១៣ ផ្លូវលេខ៣៨៣ សង្កាត់ផ្សារ ដើមគ ខណ្ឌទួលគោក ជាមួយសង្សាររបស់ ខ្លួន ឈ្មោះហៃ ស្រីទី អាយុ១៤ឆ្នាំ រស់នៅ ផ្ទះជួល ក្នុងសង្កាត់ផ្សារដេប៉ូ ខណ្ឌទួល គោក បានជិះម៉ូតូម៉ាកស្កុបពី ពណ៌ខ្មៅ ពាក់ស្លាក លេខភ្នំពេញ 1BQ-1211 លុះដល់ចំណុចកើតហេតុ ក៏បានបុកបុរសជន ជាតិវៀតណាម ឈ្មោះចូវ យ៉ាន អាយុ៥៧ឆ្នាំ ស្នាក់នៅផ្ទះជួលលេខ៤២ ផ្លូវលេខ១១៣ សង្កាត់បឹងកេងកងទី១ ខណ្ឌចំការមន ខណៈកំពុងរុញរទេះលក់ភេសជ្ជៈ បណ្ដាលឱ្យ ស្លាប់ ពេលបញ្ជូនទៅសង្គ្រោះ នៅមន្ទីរពេទ្យ កាល់ម៉ែត រយៈពេល៦ម៉ោង ក្រោយ ។
យោងតាមសមត្ថកិច្ចចរាចរបានឱ្យដឹងថា ក្រោយកើតហេតុ ម៉ូតូ និងរទេះរុញ ត្រូវបានរក្សា ទុកនៅការិយាល័យ ចរាចរណ៍ជើងគោក រាជធានីភ្នំពេញ ដោយឡែកយុវជនអ៊ឹង ផេងហួរ ជាជនបង្កត្រូវបាននគរបាលចរាចរណ៍បញ្ជូន ខ្លួនទៅកាន់សាលា ដំបូងរាជធានីភ្នំពេញ នៅរសៀលថ្ងៃទី២៦ ខែធ្នូ ឆ្នាំ២០១២ ដើម្បីចាត់ការតាមនីតិវិធី៕
ដោយ៖ ហេង នាង
