រកឃើញមនុស្សទាំង១៣នាក់ដែលបាត់ខ្លួននៅក្នុងរូងភ្នំថាំលួងហើយ
សារព័ត៌មាន Cambodia News/
បាងកក ៖ ក្រុមសង្គ្រោះនៅម៉ោងប្រមាណ១០ និង២៥នាទីយប់មិញបានរកឃើញក្មេងបាត់ខ្លួនទាំង ១២នាក់ និងគ្រូបង្វឹកបាល់ទាត់ពួកគេម្នាក់នៅក្នុងរូងភ្នំថាំលួងហើយ ដោយពួកគេនៅមានជីវិតទាំងអស់ ប៉ុន្តែស្ថិតនៅក្នុងស្ថានភាពហេវហត់បំផុត។ សារព័ត៌មានផ្លូវការរបស់រដ្ឋថៃបានចេញផ្សាយនៅយប់ថ្ងៃចន្ទ ទី០២ ខែកក្កដា ឆ្នាំ២០១៨។
ទោះបីជាបែបនេះក្តី តំណាក់កាលសំខាន់បន្ទាប់ គឺការយកពួកគេចាកចេញពីរូងភ្នំមកវិញ ព្រោះតែស្ថានភាពក្នុងនោះមានភាពលំបាកខ្លាំងណាស់ ដោយសារចម្ងាយដ៏ឆ្ងាយ ហើយចំណុចខ្លះ គឺក្រុមជំនាញសង្គ្រោះបានអះអាងថា ពួកគេត្រូវមុជកាត់ភក់ថែមទៀតផង ទើបអាចត្បុលទៅដល់កន្លែងដែលមនុស្សទាំង១៣នាក់ ជាប់ខ្លួនអស់រយៈពេល០៩ថ្ងៃមកហើយនេះ។
ពេលនេះក្រុមសង្គ្រោះកំពុងតែស្វែងរកកន្លែងមួយ ដែលមានសុវត្ថិភាពពីទឹកជំនន់ក្នុងរូងភ្នំ ដើម្បីរៀបចំជាកន្លែងស្នាក់បណ្តោះអាសន្នរបស់ ជនរងគ្រោះទាំង ១៣នាក់ខាងលើនេះ៕
