សម្ដេច ហ៊ុន សែន រំលឹកពីខួប២៨ឆ្នាំនៃការចរចារសន្តិភាពរវាងខ្មែរ និងខ្មែរ
សារព័ត៌មាន Cambodia News/
ភ្នំពេញ (២០ មករា ២០១៦) ៖ សម្ដេចនាយករដ្ឋមន្ត្រីហ៊ុន សែនបានបង្ហាញប្រវត្តិសាស្ត្រសំខាន់ៗមួយចំនួននៅក្នុងបណ្ដាញហ្វេស ប៊ុករបស់សម្ដេចអំពីការចាប់ផ្ដើមសន្តិភាពនៅកម្ពុជា។
ដោយថ្ងៃទី២០ ខែមករា ឆ្នាំ២០១៦នេះ គឺជាខួប២៨ ឆ្នាំហើយនៃការចរចាសន្តិភាពដំណាក់កាលទី២ រវាងអតីតព្រះមហាក្សត្រកម្ពុជា សម្តេចព្រះ នរោត្តម សីហនុ និងសម្ដេចហ៊ុន សែននៅ Saint -Germainen-en-Laye។ ការចរចារលើកទី១ គឺនៅថ្ងៃទី ២ ខែធ្នូ ១៩៨៧ នៅ Fere-en-Tardenois, ប្រទេសបារាំងដែលបានចេញជាសេចក្តីប្រកាសរួមក្នុងការស្វែងរក សន្តិភាពពិតប្រាកដសម្រាប់កម្ពុជា។
កិច្ចចារចារនេះធ្វើឡើងមួយថ្ងៃ នៅថ្ងៃទី ២០ មករា ១៩៨៨ គឺបានពិភាក្សាលើទិដ្ឋភាពរួមដើម្បីរកដំណោះស្រាយផ្ទៃក្នុងរវាងខ្មែរ និងខ្មែរដើម្បីបញ្ចប់សង្គ្រាមទាំងស្រុង។
សម្ដេចបន្តថា បើទោះបីជាពេលនោះ សាធារណះរដ្ឋប្រជាមានិតកម្ពុជា គ្រប់គ្រងទឹកដី និងប្រជាពលរដ្ឋជាង៩០%ក៏ដោយ ក៏ចំពោះក៏សម្ដេចគិតថា ត្រូវតែស្វែងរកសន្តិភាពអោយបានសម្រាប់កម្ពុជា ហើយត្រូវទទួលយកបងប្អូនជនភៀសខ្លួននៅតាមជំរំនានាពីព្រំដែនកម្ពុជា-ថៃ វិលត្រឡប់មករស់នៅក្នុងប្រទេសវិញ។ សម្ដេចបានសម្រេចចិត្តថា ត្រូវតែបញ្ចប់សង្គ្រាមបង្ហូរឈាមខ្មែរ ទោះបីការចរចារពេលនោះជួបនិងការលំបាកនិងត្រូវចំណាយពេលច្រើនឆ្នាំយ៉ាងណា ក៏ត្រូវតែធ្វើការចរចារព្រោះវាល្អប្រសើរជាងការប្រយុទ្ឋគ្នាលើសមរភូមិយោធាដែលធ្វើឱ្យឈាមខ្មែរហូរមិនចេះចប់។
សម្ដេចថា ការម្រេចចិត្តរបស់សម្ដេចបានធ្វើឲ្យកម្ពុជាបានទទួលផលចំណេញ និងឈ្នះទាំងអស់គ្នាមកទល់សព្វថ្ងៃ។ជាចុងក្រោយសម្ដេចនាយករដ្ឋមន្ត្រីបានបញ្ជាក់ថា សុខទុក្ខនិងការរស់នៅរបស់ប្រជាពលរដ្ឋកាលពី ២៨ ឆ្នាំមុន និងការរស់នៅសព្វថ្ងៃគឺបានបញ្ជាក់ច្បាស់ថា សន្តិភាព បានផ្តល់ឱកាសដល់ពលរដ្ឋ និងរាជរដ្ឋាភិបាលក្នុងការកសាង និងអភិវឌ្ឍន៍ប្រទេសជាតិយើងកាន់តែរីកលូតលាស់ទៅមុខ៕
