មនុស្ស ១៦នាក់សម្លាប់ដោយរន្ទះបាញ់នៅដើមឆ្នាំ២០១២
នៅថ្ងៃទី២៣ មេសា ២០១២ លោកញឹម វណ្ណដា បាននិយាយឲ្យដឹងថា នៅឆ្នាំ២០១២នេះតាមរយៈគណៈកម្មាធិការជាតិគ្រប់គ្រងគ្រោះមហន្តរាយ និងក្រសួងជំនាញមួយចំនួន គឺមានការប្រែប្រួលអាកាសធាតុមានបញ្ហាកើតឡើងច្រើន ដូចជា ស្យល់ព្យុះ ភ្លៀង និងរន្ទះបាញ់។
លោកបន្តថា រយៈពេលពីដើមឆ្នាំ២០១២ មកដល់ថ្ងៃទី២២ ខែមេសា ឆ្នាំ២០១២នេះ ការប៉ះពាល់ និងខូចខាតដោយខ្យល់ព្យុះ រួមមាន រលំផ្ទះទាំងស្រុង ២៤២ខ្នង របើកដំបូល និងជញ្ជាំងមាន ១.៤០៣ខ្នង របើកដំបូលសាលារៀន ១៤ខ្នង ប្រជាពលរដ្ឋស្លាប់ ៥នាក់ និងរបួស ៣៧នាក់ ប្រជាពលរដ្ឋរងគ្រោះដោយសាររន្ទះបាញ់ ស្លាប់ ១៦នាក់ របួស ១៤នាក់ ងាប់គោក្របី ១៤ក្បាល ខូចផ្ទះទាំងស្រុង ៣ខ្នង។
នៅក្នុងរបៀបវារៈដែលសម្ដេចអគ្គមហាសេនាបតីតេជោ ហ៊ុន សែន បានដាក់ជូនផែនការ ១០ប្រទេស ឆ្នាំ២០១២-២០១៥ ស្ដីពីការគ្រប់គ្រងគ្រោះមហន្តរាយ គឺជាបញ្ហាសំខាន់ គឺការប្រែប្រួលអាកាសធាតុ នៅក្នុងចំណុចទី៧។ ការប្រែប្រួលអាកាសធាតុ គឺជាការប្រឈមមុខដែលបណ្ដាលមកពីធម្មជាតិ មនុស្ស ហើយគ្រោះធម្មជាតិទាំងនោះ ធ្វើឲ្យមានជំងឺឆ្លងផ្សេងៗរីករាលដាលផងដែរ។
ការខូចខាតដោយ ខ្យល់ព្យុះក្នុងរយៈ ៤ខែ ឆ្នាំ២០១១កន្លងមក រលំផ្ទះ ១៤២ខ្នង របើកដំបូល និងជញ្ជាំង ១៨៨ខ្នង របើកដំបូលសាលា ៨ខ្នង ប្រជាពលរដ្ឋរបួស ១២នាក់ រងគ្រោះដោយរន្ទះបាញ់ស្លាប់ ៣៧នាក់ របួស ៣៨នាក់ ងាប់គោក្របី ៣៤ក្បាល ខូចផ្ទះទាំងស្រុង ២ខ្នង៕