ក្រសួងប្រៃសណីយ៍ ប្រកាសឲ្យប្រព័ន្ធទូរស័ព្ទ យកតម្លៃខលធម្មតា
ភ្នំពេញ៖ ក្រសួងប្រៃសណីយ៍ និងទូរគមនាគមន៍ ប្រកាសឲ្យក្រុមហ៊ុនប្រព័ន្ធទូរស័ព្ទទាំងអស់ ដែលកំពុងចរាចរណ៍នៅកម្ពុជា បញ្ឈប់ការផ្តល់សេវាតម្លៃបន្ថែមទឹកប្រាក់ ឬដូរលុយ ដោយគិតតម្លៃច្បាស់លាស់ជានាទីវិញសម្រាប់ការហៅចេញ។
កាលពីថ្ងៃទី២៨ខែវិច្ឆិកា ក្រសួងបានចេញសេចក្តីជូនដំណឹងដល់ក្រុមហ៊ុនប្រព័ន្ធទូរស័ព្ទទាំងអស់ ដោយឲ្យក្រុមហ៊ុនទាំងនោះ យកតម្លៃហៅទូរស័ព្ទចេញក្នុងមួយនាទីធម្មតាវិញ ដើម្បីជាការគោរពតាមបញ្ញត្តិរបស់ក្រសួងប្រៃសណីយ៍ និងទូរគមនាគមន៍ និងជាការការពារផលប្រយោជន៍របស់ក្រុមហ៊ុន។
យោងតាមសេចក្តីជូនដំណឹងបានឲ្យដឹងថា ក្រសួងចង់ឲ្យយកថ្លៃដើម ដើម្បីឲ្យការប្រកួតប្រជែងឲ្យមានតម្លាភាព មិនចង់ឲ្យក្រុមហ៊ុនផ្សេងទៀតដួលរលំ និងចង់ឲ្យមានអ្នកវិនិយោគលើសេវានេះកាន់តែច្រើន។
កាលពីខែមីនា ឆ្នាំ២០១៣ និយតករទូរគមនាគមន៍កម្ពុជារបស់ក្រសួងប្រៃសណីយ៍ និងទូរគមនាគមន៍ បានព្រមានក្រុមហ៊ុនទូរស័ព្ទចល័ត ប៊ីឡាញ និង ស្មាត ពីការរំលោភប្រកាសអន្តរក្រសួងក្នុងការផ្សព្វផ្សាយផ្ដល់អត្រាការហៅ ទូរស័ព្ទក្នុងបណ្ដាញមិនយុត្តិធម៌ ដូចជា២ដុល្លាររបស់ស្មាតមានតម្លៃហៅចេញ៣០ដុល្លារ និង២ដុល្លារ របស់ប៊ីឡាញមានតម្លៃ៥០ដុល្លារ។ ក្រសួងប្រៃសណីយ៍ បានកំណត់ថា ថ្លៃសេវាអប្បបរមានៃការហៅ ទូរស័ព្ទក្នុងប្រព័ន្ធ មានអត្រា៤,៥សេនក្នុងមួយនាទី៕ នាង/យុវវ័យថ្មី
