ទស្សនកិច្ចលើកដំបូងរបស់ប្រធានាធិបតីអេហ្ស៊ីបនៅប៉ាគីស្ថាន
លោកប្រធានាធិបតីអេហ្ស៊ីប Mohamed Morsi បានអញ្ជើញទៅដល់ទីក្រុង Islamabad ប្រទេសប៉ាគីស្ថាននៅព្រឹកថ្ងៃចន្ទ១៨មីនានេះ។ គឺជាដំណើរទស្សនកិច្ចផ្លូវរដ្ឋលើកដំបូងបង្អស់របស់ ប្រធានាធិបតីអេហ្ស៊ីបនៅប៉ាគី ស្ថាន ចាប់តាំងពីដំណើរទស្សនកិច្ចរបស់លោក Gamal Nasser កាលពី៤០ឆ្នាំមុន-នេះបើយោងតាមការអះអាងរបស់ទូរទស្សន៍ រដ្ឋប៉ាគីស្ថាន។
ដោយដឹកនាំ គណប្រតិភូជាន់ខ្ពស់អេហ្ស៊ីបមួយ លោក Morsi ត្រូវបានទទួលស្វាគមន៍ ពីសំណាក់ឥស្សរជននយោបាយជាន់ខ្ពស់នៃប្រទេសប៉ាគីស្ថាននិងក្រុម អ្នកការទូតនៅលើព្រលានយន្តហោះយោធាប៉ាគីស្ថាន នៅព្រឹកថ្ងៃចន្ទ១៨មីនានេះ ។
«ដំណើរទស្សនកិច្ចរបស់លោក Morsi នៅព្រឹកមិញនេះ ជានិមិត្តរូបមួយដ៏សំខាន់នៅក្នុងទំនាក់ទំនង ជាប្រពៃណីនិងមិត្តភាពរវាងប្រទេសអ៊ីស្លាមទាំងពីរ អេហ្ស៊ីបនិង ប៉ាគីស្ថាន »នេះជាការបញ្ជាក់របស់ក្រសួងការបរទេសប៉ាគី ស្ថាន។ ក្រសួងការបរទេសប៉ាគីស្ថាន បានបន្ថែមទៀតថា ” ជាដំណើរទស្សនកិច្ចទ្វេរភាគីលើកដំបូងរបស់ប្រធានាធិបតី អេហ្ស៊ីបម្នាក់ចាប់តាំងពីដំណើរទស្សនកិច្ចរបស់លោក Nasser នៅទស្សវត្តន៍ឆ្នាំ៦០។ ចាប់តាំងពីពេលនោះមក លោកប្រធានាធិបតីSadate បានស្នាក់នៅប៉ាគីស្ថាននៅឆ្នាំ១៩៧៤ ក្នុងក្របខណ្ឌ នៃជំនួបកំពូលពហុភាគី។
ម្យ៉ាងទៀត សេចក្តីសម្រេចចិត្តជ្រើសយកប៉ាគីស្ថានសំរាប់ដំណើរទស្សន កិច្ចលើក ដំបូងរបស់លោក Morsiនៅក្នុងតំបន់អាស៊ីខាងត្បូងនេះក៏ជាសញ្ញា បញ្ជាក់ផងដែរ អំពីបំណងរបស់អេហ្ស៊ីប ក្នុងការចង់បន្ថែមទំព័រ ថ្មីមួយនៅលើទំនាក់ទំនងទ្វេរភាគីរបស់អេហ្ស៊ីបជាមួយប៉ាគីស្ថាន។
ក្រោយពីជំនួបរវាងលោក Morsi និងលោកប្រធានាធិបតីប៉ាគីស្ថាន Asif Ali Zardari កិច្ចព្រមព្រៀងជាឧបតោភាគីជាច្រើនប្រហែលជានឹងត្រូវចុះ ក្នុងគោល ដៅដើម្បីពង្រឹងសហប្រតិបត្តិការ រវាងអេហ្ស៊ីបនិងប៉ាគីស្ថាន នៅលើវិស័យស្រាវជ្រាវបច្ចេកវិជ្ជានិងការប្តោះប្តូរពាណិជ្ជកម្ម រវាងប្រទេសអ៊ីស្លាមទាំងពីរនេះដែរ។
កាលពីខែវិច្ឆិកាឆ្នាំមុន នៅពេលហៀបនឹងចេញដំណើរ លោក Morsi បានលុបចោលវិញភ្លាម គម្រោងទស្សនកិច្ចរបស់លោកមួយនៅក្រុងអ៊ីស្លាម៉ា បាត ដើម្បីចូលរួមជំនួបកំពូល D8 ជាភាសាអង់គ្លេស«Developping Eight”។
“Developping Eight” ជាជំនួបកំពូលដើម្បីង្រឹងសហប្រតិបត្តិការណ៍ រវាងក្រុមប្រទេសអ៊ីស្លាមចំនួន៨ប្រទេសរួមមាន ឥណ្ឌូនេស៊ី ម៉ាឡេស៊ី បង់ក្លាដែស ប៉ាគី ស្ថាន អ៊ីរ៉ង់ ទួរគី អេហ្ស៊ីប និង នីហ្សេរីយ៉ា។
ស្របពេលនឹងដំណើរទស្សនកិច្ចរបស់ប្រធានាធិបតីអេហ្ស៊ីបនៅប៉ាគីស្ថាន អំពើភេរវកម្មអត្តឃាតមួយ បានសម្លាប់ជីវិតមនុស្សយ៉ាងតិច៤នាក់និងអ្នករងរបួស២៣នាក់ផ្សេង ទៀតនៅពេលរសៀលថ្ងៃចន្ទនេះដែរ។ ភេរវជនអត្ត ឃាតម្នាក់ បានបំផ្ទុះគ្រាប់បែកនៅពីមុខតុលាការ និងបន្ទាប់មកទៀតមានការបាញ់តដៃគ្នានៅទីក្រុង Peshawar ដែលស្ថិតនៅភាគពាយ័ព្យនៃប្រទេសប៉ាគី ស្ថាន៕ដោយ នុយ ប៊ែរណាដែត(RFI)