ពួកឧទ្ទាមវាយប្រហារគុករំដោះអ្នកទោស១៣២នាក់នៅហ្វីលីពីន
សារប័ត៌មានយុវវ័យថ្មី/
ហ្វីលីពីន (០៤ មករា ២០១៧) ៖ ក្រុមមន្ត្រីបាននិយាយថា ជនប្រដាប់អាវុធមួយក្រុមដែលមានទំនាក់ទំនងជាមួយ ក្រុមឧទ្ទាមមូស្លីមបានវាយប្រហារពន្ធនាគារមួយ នៅប្រទេសហ្វីលីពីនភាគខាងត្បូង នៅថ្ងៃពុធទី៤ខែមករា ដោយបានសម្លាប់សន្តិសុខម្នាក់ និងរំដោះអ្នកទោសចំនួន១៣២នាក់។
ការបាញ់គ្នារយៈពេល២ម៉ោង បានកើតឡើង នៅពេលដែលក្រុមជនប្រដាប់អាវុធជាង១០០នាក់ បានវាយប្រហារគុកនេះនៅខេត្តកូតាបាតូខាងជើង (North Cotabato) ដោយបាញ់យ៉ាងខ្លាំងសំដៅលើក្រុមសន្តិសុខគុក ដោយធ្វើឱ្យក្រុមអ្នកទោសមានឱកាសដើម្បីរត់គេចខ្លួន។
លោក ភីតធឺ ចន ហុងហ្គាត (Peter John Bonggat) អ្នកគ្រប់គ្រងពន្ធនាគារនេះ បាននិយាយប្រាប់ទូរទស្សន៍ABS-CBN ថា “វាជាការវាយប្រហារដើម្បីរំដោះមិត្តរបស់ពួកវា ដែលស្ថិតនៅក្នុងការឃុំខ្លួនរបស់យើង។ កងសន្តិសុខគុកបានស្ថិតនៅក្រោមការបាញ់ប្រហារខ្លាំងពីក្រុមអ្នកវាយប្រហារនេះ។ ពួកអ្នកទោសទាំងនេះ បានឆក់ឱកាសនេះដើម្បីរត់គេចខ្លួន ដោយសារតែមានការបាញ់ប្រហារដ៏ខ្លាំងនេះ”៕
