បុរសម្នាក់ជិះម៉ូតូទៅបុកគូទរថយន្តបណ្តលឲ្យបែកចិញ្ចើម
ភ្នំពេញ៖ កាលពីវេលាម៉ោង១៣និង៤៥នាទី ថ្ងៃទី២៣ ធ្នូ ២០១២ បុរសម្នាក់បានរងរបួស បែកចិញ្ចើមដោយសារជិះម៉ូតូធុនធំសេរីទំនើប ទៅបុកគូទរថយន្តរបស់ស្ថានទូតអាមេរិក នៅតាមបណ្តោយវិថីព្រះនរោត្តមទល់មុខភោជនីយ៍ដ្ឋានស៊ូស៊ីប៊ីន ស្ថិតក្នុងសង្កាត់បឹង កេងកងទី១ ខណ្ឌចំការមន។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូមួយគ្រឿងម៉ាក YAMAHA ធុនធំស៊េរីទំនើបពណ៌លឿងបើកបរដោយបុរសមិនស្គាល់អត្តសញ្ញាណម្នាក់ តាមបណ្តោយវិថីព្រះនរោត្តម ក្នុងទិសដៅពីត្បូងទៅជើងក្នុងល្បឿនលឿន លុះពេលមកដល់ចំណុចកើតហេតុខាងលើក៏បុកគូទរថយន្តស៊េរីទំនើបមួយគ្រឿង ម៉ាក CRV ពណ៌ប្រផេះពាក់ស្លាក់លេខ CD25-ESSAI ជារថយន្តរបស់ស្ថានទូតអាមេរិក ដែលបើកបរស្របទិសគ្នាហើយក៏បានបុកគ្នាយ៉ាងពេញទំហឹង បណ្តាលឲ្យបុរសជាម្ចាស់ម៉ូតូរងរបួសបែកចិញ្ចើមនិងម៉ូតូរង ការខូចខាតយ៉ាងដំណំ រីឯរថយន្តវិញខូចខាតផ្នែកខាងក្រោយតិចតួចប៉ុណ្ណោះ។
ក្រោយពេលកើតហេតុម្ចាស់ម៉ូតូបានជិះម៉ូតូរ៉ឺម៉កកង់ទៅមន្ទីពេទ្យ ដើម្បីព្យាបាលរបួស។ចំណែកម៉ូតូនិងរថយន្តត្រូវបានប៉ូលិសជំនាញចុះ ធ្វើការវាស់វែងដកហូតយកទៅរក្សាទុកនៅការិយាល័យចរាចរជើងគោករាជធានី ភ្នំពេញរង់ចាំការដោះស្រាយតាមច្បាប់៕
ដោយ៖ ហេង នាង
