លោកហ៊ុន សែនបញ្ជាឲ្យបញ្ជូនអ្នកបាញ់ពលរដ្ឋមកផ្តន្ទាទោស
លោកនាយករដ្ឋមន្ត្រី ហ៊ុន សែន បានព្រមានទៅលោកឧកញ៉ា ណា ម៉ារឌី ម្ចាស់ក្រុមហ៊ុន ធីធីវ៉ាយ ចំពោះទង្វើរបស់កម្លាំងប្រដាប់អាវុធការពារក្រុមហ៊ុន ដែលបានបាញ់ប្រជាពលរដ្ឋរស់នៅឃុំពីរធ្នូ ស្រុកស្នួល ខេត្តក្រចេះ ឲ្យរងរបួសលើករណីជម្លោះដីធ្លីកន្លងមក។
លោក ហ៊ុន សែន បានបន្តថា លោកឧកញ៉ា ណា ម៉ារឌី ត្រូវបញ្ជូនទាហានការពារក្រុមហ៊ុនរបស់ខ្លួន ដែលបានបាញ់ពលរដ្ឋនៅឃុំពីរធ្នូ ស្រុកស្នួល ខេត្តក្រចេះ ឲ្យរងរបួសធ្ងន់ មកផ្ដន្ទាទោសឲ្យបានឆាប់។
បើមិនព្រមប្រគល់ជនល្មើសមកឲ្យរដ្ឋាភិបាល ឬអាជ្ញាធរនោះទេ លោកឧកញ៉ា ណា ម៉ារឌី នឹងត្រូវជាអ្នកចូលខ្លួនមកជំនួស។ លោក ហ៊ុន សែនមានប្រសាសន៍ដូច្នេះនៅក្នុងពិធីដាក់ឲ្យប្រើប្រាស់កំណាត់ផ្លូវជាតិ លេខ៧៦ ពីស្រុកស្នួល ខេត្តក្រចេះ ទៅក្រុងសែនមនោរម្យ ខេត្តមណ្ឌលគិរី ព្រឹកថ្ងៃទី៣១ មករា ២០១២៕