បទវិភាគ៖ពាណិជ្ជកម្មអន្តរជាតិរបស់ប្រទេសចិនពន្លឿនការធ្វើបរិវត្តកម្មឆ្ពោះទៅរកភាព”បៃតង”ដើម្បីបំពេញបន្ថែមនូវកម្លាំងចលករបៃតងកាន់តែច្រើនសម្រាប់ការអភិវឌ្ឍនៃប្រទេសនានា
Cambodia News
នាពេលថ្មីៗនេះ នៅតាមកំពង់ផែយ៉ាងចូវ ខេត្តជាំងស៊ូ ប្រទេសចិន ម៉ាស៊ីនថាមពលដើរដោយខ្យល់ចំនួន ៤ ឈុតត្រូវបានស្ទូចឡើងលើនាវាសម្រាប់នាំចេញទៅបរទេស ។ យោងតាមការបង្ហាញរបស់បុគ្គលិកបានឱ្យដឹងថា កាលពីមុន ការនាំចេញគ្រឿងបរិក្ខារថាមពលដើរដោយខ្យល់របស់ប្រទេសចិនភាគច្រើនគឺ នាំចេញគ្រឿងបន្លាស់តែប៉ុណ្ណោះ ប៉ុន្តែ ស្របពេលដែលបរិមាណនាំចេញបានកើនឡើងនិងខ្សែសង្វាក់ឧស្សាហកម្មប្រមូលផ្តុំព្រមៗគ្នា បច្ចុប្បន្ននេះ នៅតាមកំពង់ផែយ៉ាងចូវ ចំនួនគ្រឿងបរិក្ខារថាមពលដើរដោយខ្យល់ជាង ៩០ ភាគរយសុទ្ធតែជាការនាំចេញម៉ាស៊ីនទាំងមូល ហើយសមាមាត្រនៃផលិតផលមានតម្លៃបន្ថែមខ្ពស់ត្រូវបានលើកកម្ពស់ជាបន្តបន្ទាប់ ។
នេះគឺជាការឆ្លុះបញ្ចាំងដ៏រស់រវើកនៃការអភិវឌ្ឍប្រកបដោយភាពបៃតងនៃ”ការផលិតដោយចិន” ។ នាពេលថ្មីៗកន្លងទៅនេះ មហាសន្និបាតឧស្សាហកម្មកម្មន្តសាលដ៏ជឿនលឿនទូទាំងប្រទេសបានបើកធ្វើនៅទីក្រុងប៉េកាំង ។ ក្នុងមហាសន្និបាតលើកនេះ បានពាំនាំនូវអនុសាសន៍ណែនាំសំខាន់របស់លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន ។ លោក Xi Jinping បានសង្កត់ធ្ងន់ថា ត្រូវប្រកាន់ខ្ជាប់ទិសដៅដែលប្រកបដោយភាពវៃឆ្លាត ភាពបៃតងនិងការរួមបញ្ចូលគ្នា ពង្រឹងនិងពង្រីកឧស្សាហកម្មកម្មន្តសាលដ៏ជឿនលឿនជាបន្តបន្ទាប់ដើម្បីផ្តល់ការទ្រទ្រង់យ៉ាងខ្លាំងក្លាដល់ការជំរុញការធ្វើទំនើបកម្មតាមបែបផែនចិន ។ អ្នកវិភាគបានសម្គាល់ឃើញថា ការរៀបចំចាត់ចែងនៃខ្លឹមសារអំពី”ភាពបៃតង”ក្នុងមហាសន្និបាតលើកនេះមិនត្រឹមតែបាននាំមកនូវ”ភាពបៃតង”កាន់តែច្រើនសម្រាប់ការអភិវឌ្ឍឧស្សាហកម្មកម្មន្តសាលប៉ុណ្ណោះទេ ប៉ុន្តែថែមទាំងបានបំពេញបន្ថែមនូវកម្លាំងចលករថ្មី
សម្រាប់ពង្រីកពាណិជ្ជកម្មបៃតងផងដែរ ។
«របាយការណ៍ស្តីពីការអភិវឌ្ឍពាណិជ្ជកម្មបៃតងរបស់ចិន(ឆ្នាំ ២០២៦ )»ដែលចេញផ្សាយនាពេលថ្មីៗនេះបានបង្ហាញថា នៅឆ្នាំ ២០២៥ បរិមាណសរុបនៃការនាំចេញនាំចូលពាណិជ្ជកម្មបៃតងរបស់ប្រទេសចិនបានឈានដល់ ៨០២,២៥១ ពាន់លានដុល្លារអាមេរិក ស្មើនឹង ១៤,៦៨ ភាគរយនៃទំហំសរុបខាងពាណិជ្ជកម្មបៃតងសកលដែលបានឈរនៅចំណាត់ថ្នាក់លេខ១លើពិភពលោក ។ ក្នុងរយៈពេល ៨ ខែដំបូងនៃឆ្នាំ ២០២៦ ការនាំចូលនាំចេញផលិតផលរបស់ចិនមានដូចជារថយន្តអគ្គិសនី អាគុយលីចូមនិងផលិតផលប្រព័ន្ធ PV ជាដើមបានកើនឡើងប្រហែល ៤០ ភាគរយបើប្រៀបធៀបនឹងរយៈពេលដូចគ្នានៃឆ្នាំ ២០២៥ ហើយការបញ្ជាទិញផលិតផលដូចជាទួរប៊ីនខ្យល់ កប៉ាល់បៃតងនិងគ្រឿងបរិក្ខារសន្សំសំចៃថាមពលនិងការពារបរិស្ថានបានកើនឡើងជាបណ្តើរៗ ។
បច្ចុប្បន្ននេះ ពាណិជ្ជកម្មសកលកំពុងស្ថិតក្នុងដំណាក់កាលគន្លឹះនៃការធ្វើបរិវត្តកម្មភាពបៃតងនិងកាបូនទាប ។ ពាណិជ្ជកម្មបៃតងចាត់ទុកការអភិវឌ្ឍប្រកបដោយនិរន្តរភាពជាទិសដៅប្រតិបត្តិការ វាមិនត្រឹមតែបានកាត់បន្ថយផលប៉ះពាល់ចំពោះបរិស្ថានប្រកបដោយប្រសិទ្ធភាពប៉ុណ្ណោះទេប៉ុន្តថែមទាំងបានពង្រីកលំហអភិវឌ្ឍន៍នៃឧស្សាហកម្មផងដែរ ។ យោងតាមការប៉ាន់ប្រមាណនៃរបាយការណ៍សន្និសីទអង្គការសហប្រជាជាតិស្តីពីពាណិជ្ជកម្មនិងការអភិវឌ្ឍបានបង្ហាញថា គិតដល់ឆ្នាំ ២០៣០ តម្លៃក្នុងទីផ្សារនៃបច្ចេកវិទ្យាបៃតងទំនើបៗដូចជារថយន្តអគ្គិសនី ថាមពលពន្លឺព្រះអាទិត្យ ថាមពលខ្យល់និងថាមពលអ៊ីដ្រូសែនបៃតងជាដើមនឹងឈានដល់ ២,១ ទ្រីលានដុល្លារអាមេរិក ។ ក្នុងនាមជាតួអង្គសេដ្ឋកិច្ចពាណិជ្ជកម្មបៃតងធំទីមួយលើទូទាំងពិភពលោក ការដែលប្រទេសចិនពង្រីកពាណិជ្ជកម្មបៃតងមិនត្រឹមតែមានអំណោយផលដល់ការអភិវឌ្ឍប្រកបដោយគុណភាពខ្ពស់របស់ខ្លួនប៉ុណ្ណោះទេ ប៉ុន្តែថែមទាំងបានជួយប្រទេសកំពុងអភិវឌ្ឍន៍ឱ្យសម្រេចបាននូវការធ្វើបរិវត្តកម្មបៃតងផងដែរដែលបានរួមចំណែកសម្រាប់ការឆ្លើយតបទៅនឹងបម្រែបម្រួលអាកាសធាតុសកល ។
ប្រទេសចិនមិនត្រឹមតែជាអ្នកផ្គត់ផ្គង់ដ៏សំខាន់នៃផលិតផលបៃតងសកលប៉ុណ្ណោះទេ ប៉ុន្តែថែមទាំងជាទីផ្សារដ៏សំខាន់នៃផលិតផលបៃតងសកលផងដែរ ។ នៅឆ្នាំ ២០២៥ ទំហំនាំចូលផលិតផលបៃតងរបស់ប្រទេសចិនបានឈានដល់ ៣៥៩,៦២៤ ពាន់លានដុល្លារអាមេរិកដែលស្មើនឹង ១២,៩១ ភាគរយនៃទំហំនាំចូលផលិតផលបៃតងសកល ក៏បានឈរនៅចំណាត់ថ្នាក់លេខ១នៅលើពិភពលោកផងដែរ ។ ការពង្រីកទីផ្សារក្នុងស្រុកសម្រាប់ផលិតផលបៃតងនិងកាបូនទាបរបស់ប្រទេសចិនបានជំរុញឱ្យខ្សែសង្វាក់ផ្គត់ផ្គង់សកលពន្លឿនការអភិវឌ្ឍប្រកបដោយភាព”បៃតង” ។
នៅពេលអនាគត ស្របពេលដែលឧស្សាហកម្មកម្មន្តសាលដ៏ជឿនលឿនរបស់ចិនទទួលបានការអភិវឌ្ឍប្រកបដោយភាពវៃឆ្លាត ភាពបៃតងនិងការរួមបញ្ចូលគ្នា ពាណិជ្ជកម្មអន្តរជាតិរបស់ប្រទេសចិនក៏នឹងពន្លឿនការធ្វើបរិវត្តកម្មទៅរកភាព”បៃតង”ដើម្បីបំពេញបន្ថែមនូវកម្លាំងចលករបៃតងកាន់តែច្រើនសម្រាប់ការអភិវឌ្ឍនៃប្រទេសនានា ក៏ដូចជារួមចំណែកកាន់តែច្រើនដល់អភិបាលកិច្ចអាកាសធាតុសកល ៕
