ហុងកុងចាប់ថ្នាំញៀនបានជាងកន្លះតោន ដែលនាំមកពីវៀតណាម
សារព័ត៌មាន Cambodia News/
ហុងកុង (០៤ វិច្ឆិកា ២០២០) ៖ កាលពីថ្ងៃចន្ទ ទី០២ ខែវិច្ឆិកា ហុងកុងបានប្រកាសពីការចាប់បានថ្នាំញៀនមេតំហ្វេតាមីនច្រើនបំផុត គឺជាងកន្លះតោន ដែលមានតម្លៃប្រមាណ៣៩លានដុល្លារអាម៉េរិក។
ថ្នាំញៀននេះត្រូវបានរកឃើញកាលពីថ្ងៃ២៩ តុលា នៅក្នុងកុងតេន័រ ដែលក្នុងបញ្ជីរាយការណ៍ទំនិញថាជាបាវស៊ីម៉ង់ត៍។
មន្ត្រីហុងកុងបាននិយាយថា ថ្នាំញៀនមេតំហ្វេតាមីនជាង៥០០គីឡូក្រាម ត្រូវចាប់បានពីកុងតឺន័រមួយ ដែលទំនិញនេះត្រូវបានដឹកមកពីវៀតណាម និងសំដៅទៅកាន់ប្រទេសអូស្ត្រាលី ។
តាមពិតកុងតេន័រនេះមានប្រភពនៅម៉ិកស៊ិច តែត្រូវបានដឹកទៅកាន់កូរ៉េខាងត្បូង និងបន្ទាប់មកទៅវៀតណាមនិងឈប់នៅទីនោះ៣ខែមុនបញ្ជូនមកកាន់ហុងកុង។
មន្ត្រីប៉ូលិសហុងកុងបាននិយាយថា ថ្នាំញៀនមេតំហ្វេតាមីនតែ២៤៤គីឡូក្រាមត្រូវចាប់បាននៅ៩ខែមកនេះ មុនការចាប់បានក្នុងបរិមាណដ៏ច្រើនកាលពីថ្ងៃព្រហស្បតិ៍សប្តាហ៍មុន។
សូមបញ្ជាក់ថា អូស្ត្រាលីជាគោលដៅធំនៃថ្នាំញៀនមេតំហ្វេតាមីន ដោយនៅទីនោះគេអាចលក់វាបានថ្លៃខ្ពស់៥ដងបើធៀបនឹងការលក់នៅផ្សារងងឹតក្នុងក្រុងហុងកុង៕
