សម្ដេចតេជោ ៖ ពលរដ្ឋមានសិទ្ធិសេរីភាពក្នុងការជ្រើសរើសជំនឿសាសនា
សារព័ត៌មាន Cambodia News/
ភ្នំពេញ ( ៣០ មករា ២០១៨) ៖ នៅព្រឹកថ្ងៃទី៣០មករា ឆ្នាំ២០១៨នេះ ប្រមុខរាជរដ្ឋាភិបាលកម្ពុជា សម្តេចតេជោហ៊ុនសែន មានប្រសាសន៍ តាមបណ្តាញសង្គមថា ខ្វះតែ១ថ្ងៃទៀតដាច់ខែមករា ហើយចូលឆ្នាំចិន ក៏នឹងមកដល់ក្នុងពេលឆាប់ៗ បន្ទាប់ពីចូលឆ្នាំសកលកន្លងទៅនេះ។ សម្តេចបន្តថា ពិតណាស់ កម្ពុជាចូលឆ្នាំ៣ដងក្នុង១ឆ្នាំ ទាំងសកល, ឆ្នាំចិន និងឆ្នាំខ្មែរ។
ពីមុនប្រទេសកម្ពុជា មិនសូវឃើញមានបងប្អូនសែនចិនច្រើនទេ ប៉ុន្តែសព្វថ្ងៃនេះ គឺមានកាន់តែច្រើនឡើងៗ ជាមួយប្រទេសជាតិ មានសុខសន្តិភាព គឺពលរដ្ឋមានសិទ្ឋិសេរីភាពពេញលេញ ក្នុងការជ្រើសរើសជំនឿសាសនា ក៏ដូចជាការអបអរប្រារព្វបុណ្យទាន ទៅតាមប្រពៃណីទំនៀមទម្លាប់ ពីដូនតាដោយគ្មានការបង្ខិតបង្ខំអ្វីឡើយ។
សម្តេចតេជោ ក៏បានបង្ហាញរូបថតអនុស្សាវរីយ៍មួយសន្លឹក ដែលសម្តេចបញ្ជាក់ថា រូបថតនេះថតក្នុងទសវត្សឆ្នាំ១៩៩១ ដែលពេលនោះសម្តេចនិងភរិយា បានទៅទស្សនកិច្ចនៅមហាកំពែងប្រទេសចិន ក្នុងពេលដឹកនាំគណប្រតិភូទៅចូលរួមកិច្ចប្រជុំ ក្រុមប្រឹក្សាជាតិជាន់ខ្ពស់ មុននឹងចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស នៅថ្ងៃទី ២៣ តុលា ឆ្នាំ ១៩៩១។
សម្តេចបញ្ជាក់ថា សន្តិភាពដែលកម្ពុជា បានខិតខំរកបានដោយលំបាកបំផុត គឺត្រូវរួមគ្នាថែរក្សាអោយបានគង់វង្សទាំងអស់គ្នា។ ការចូលរួមចំណែក របស់ជនរួមជាតិ គឺបានធ្វើអោយប្រទេសជាតិ មានមានសេចក្តីសុខ និងកាន់តែរីកចម្រើនមកទល់សព្វថ្ងៃ។នៅចុងបញ្ចប់សម្តេចបានផ្ញើរសារ ជូនពរជនរួមជាតិមានសុខសុភមង្គលក្នុងក្រុមគ្រួសារ សំណាងល្អ និងមានសុខសុវត្ថិភាពក្នុងការធ្វើដំណើរជិតឆ្ងាយទាំងក្នុង និងក្រៅប្រទេសកុំបីខាន៕
