មន្ត្រីប៉ូលីសម្នាក់ បានវាយអ្នកកាសែតពេលចុះថតយករូបភាពគ្រោះថ្នាក់ចរាចរ
សារព័ត៌មាន Cambodia News/
ភ្នំពេញ៖ កាលពីវេលាម៉ោង១១យប់ ថ្ងៃទី៥ ខែមីនា សមត្ថកិច្ចនគរបាលខណ្ឌទួលគោក បានឃាត់ខ្លួនមន្ត្រីប៉ូលីសម្នាក់ដែលបើកម៉ូតូ ក្នុងស្ថានភាព ស្រវឹងរួចទៅបុកគូទម៉ូតូរបស់គេ ស្ថិតនៅផ្លូវសហព័ន្ធរុស្ស៊ី ក្នុងសង្កាត់ទឹកល្អក់១ ខណ្ឌទួលគោក ហើយបង្កការវាយដំលើអ្នកកាសែតយ៉ាងចាស់ដៃក្នុងពេលចុះយកព័ត៌មាន ដើម្បី ផ្តិតយករូបភាពបណ្តាលឲ្យរងរបួស។
-
មន្ត្រីប៉ូលីស ដែលបើកម៉ូតូ ទាំងស្រវឹងរួចទៅបុកគូទម៉ូតូរបស់គេ ហើយប្រើហឹង្សា វាយដំលើអ្នកការសែតយ៉ាងចាស់ដៃក្នុងពេលចុះយកព័ត៌មាន។ ជនបង្ក ហេតុឈ្មោះ ភួន សោភ័ណ្ឌ អាយុប្រហែល៣០ឆ្នាំ បម្រើការងារនៅអង្គភាពបេឡាក្រសួងមហាផ្ទៃបាន ជិះម៉ូតូមួយគ្រឿង ពាក់ស្លាកលេខនគរបាល។
ចំណែក អ្នកកាសែតដែលបុរសរូបនោះវាយមានគ្នា៣ នាក់ ជាអ្នកយកពត៌មានទូរទស្សន៍បាយ័ន, CNC និងអ្នកយកព័ត៌មានទូរទស្សន៍ប៉ុស្តិ៍លេខ៩ សម្ភារខូចខាតមានទូរស័ព្ទដៃមួយគ្រឿងម៉ាកអាយហ្វូន និងកាមេរ៉ា ។
តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុបុរសជាមន្ត្រីប៉ូលីសជិះម៉ូតូទៅបុកគូទម៉ូតូគេ ពេលនោះអ្នកកាសែតបានចុះទៅផ្តិតយករូបភាព ប៉ុន្តែពេលដែលកំពុងថតស្រាប់តែបុរសរូបនោះបានចាប់កាមេរ៉ា ទូរស័ព្ទមិនឲ្យថត និងវាយទៅលើអ្នកកាសែតបណ្តាលឲ្យរបួសរបួស។
មន្ត្រីប៉ូលីសមូលដ្ឋានបានចុះទៅដល់កន្លែងកើតហេតុភ្លាមៗ និងបានឃាត់ខ្លួនបុរសខាងលើមកកាន់អធិការដ្ឋាន ខណ្ឌទួលគោក ដើម្បីសាកសួរនិងដោះស្រាយតាមច្បាប់ ។ ចំណែកអ្នកកាសែតបានដាក់ពាក្យបណ្តឹងប្តឹង បុរសដែលប្រើហិង្សាទៅ លើអ្នកកាសែតរួចរាល់ហើយ៕
