នាយករដ្ឋមន្ដ្រីកម្ពុជានឹងអញ្ជើញចូលរួមពិធីថ្វាយព្រះភ្លើងអតីតព្រះមហាក្សត្រថៃ
សារព័ត៌មាន Cambodia News/
ភ្នំពេញ (២៤ តុលា ២០១៧) ៖ នាយករដ្ឋមន្ត្រីនៃកម្ពុជា សម្ដេចអគ្គមហាសេនាបតីតេជោហ៊ុន សែន នឹងដឹកនាំគណៈប្រតិភូជាន់ខ្ពស់អញ្ជើញទៅចូលរួមពិធីថ្វាយព្រះភ្លើង អតីតព្រះមហាក្សត្រ នៃព្រះរាជាណាចក្រថៃ ព្រះបាទ ភូមិបុល អាឌុលយ៉ាតេជ នៅថ្ងៃទី ២៦ ខែតុលា ឆ្នាំ២០១៧ នៅទីក្រុងបាងកក នៃប្រទេសថៃ ។
យោងតាមសេចក្ដីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្ដរជាតិ នៅថ្ងៃទី២៤ ខែតុលា ឆ្នាំ២០១៧បានឲ្យដឹងថា “សម្តេចតេជោនាយករដ្ឋមន្ត្រី នឹងត្រូវអមដំណើរដោយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិ ព្រមទាំងសមាជិកនៃរាជរដ្ឋាភិបាលកម្ពុជាដទៃទៀត ”។
សេចក្ដីជូនដំណឹងនេះ ក៏បានឲ្យដឹងថា ការអញ្ជើញចូលរួមរបស់សម្តេចតេជោ ក្នុងពិធីនេះគឺដើម្បីសម្តែងនូវសមានចិត្តនិងមរណទុក្ខដ៏ស្មោះស្ម័គ្រ ថ្វាយនិងជូនចំពោះរាជវង្សានុវង្ស រាជរដ្ឋាភិបាលនិងប្រជាជនថៃ ព្រមទាំងសម្តែងការគោរពចុងក្រោយចំពោះព្រះវិញ្ញាណក្ខន្ធអតីត ព្រះមហាក្សត្រថៃ ដែលបានសោយទិវង្គតកាលពីថ្ងៃទី ១៣ ខែតុលា ឆ្នាំ២០១៦ នៅក្នុងមន្ទីរពេទ្យ សិរីរាជ នៅក្នុងក្រុងបាងកក ប្រទេសថៃឡង់ដ៏ក្នុងព្រះជន្ម៨៨ព្រះវស្សា៕
