ចាប់ឃាត់ខ្លួនជនសង្ស័យចាក់សម្លាប់មនុស្សនៅតាខ្មៅបាននៅសៀមរាប
សារព័ត៌មាន Cambodia News/
ខេត្តសៀមរាប (០៤ កក្កដា ២០១៧) ៖ ជនសង្ស័យដែលចាក់សម្លាប់ជនរងគ្រោះកាលពីរវេលាម៉ោង៤និង៥១នាទីល្ងាច ថ្ងៃទី២ ខែកក្កដា ឆ្នាំ២០១៧ ស្ថិតនៅក្នុងបន្ទប់ទឹក កន្លែងលេងអ៊ិនធឺណែត ភូមិតាខ្មៅ សង្កាត់/ក្រុងតាខ្មៅ ខេត្តកណ្តាលបានរត់គេចខ្លួនមកពួនសម្ងំនៅក្នុងខេត្តសៀមរាប រហូតឈានដល់ចាប់ខ្លួនបានជនដៃដល់ រួចបញ្ជូនមកកាន់ការិយាល័យជំនាញនៃកងរាជអាវុធហត្ថខេត្ត ហើយបញ្ជូនបន្តទៅឱ្យកងរាជអាវុធហត្ថខេត្តកណ្តាលទាំងយប់ ដើម្បីចាត់ការតាមនីតិវិធី។
ហេតុការបង្ក្រាបករណីឃាតកម្មដែលកម្លាំងជំនាញបានឃាត់ខ្លួនជនសង្ស័យនោះធ្វើឡើងនៅវេលាម៉ោង៤និង៣០នាទីល្ងាច ថ្ងៃទី៣ ខែកក្កដា ឆ្នាំ២០១៧ ស្ថិតនៅចំណុចក្នុងបេនឡានក្រុមហ៊ុន រិទ្ធ មុន្នី ភូមិចុងកៅស៊ូ សង្កាត់ស្លក្រាម ក្រុងសៀមរាប ខណៈជនសង្ស័យបានជិះឡានក្រុមហ៊ុននេះ បម្រុងមកស្នាក់នៅបណ្តោះអាសន្នក្នុងក្រុងសៀមរាប។
លោកវរសេនីយ៍ឯក ស្រី យូរ៉ា មេបញ្ជាការរង នៃកងរាជអាវុធហត្ថខេត្តសៀមរាប ទទួលការងារយុត្តិធម៌ បានឲ្យដឹងថា ជនសង្ស័យមានឈ្មោះ អ៊ឹង ចាន់រតនៈ ភេទប្រុស អាយុ២៥ឆ្នាំ មុខរបលក់ដូរនៅផ្សារតាខ្មៅ មានស្រុកកំណើតនៅ សង្កាត់មិត្តភាព ខណ្ឌ៧មករា រាជធានីភ្នំពេញ បច្ចុប្បន្នរស់នៅភូមិតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ចំណែកសពជនរងគ្រោះ ឈ្មោះ រ័ត្ន ពុទ្ធថា ភេទប្រុស អាយុ២១ឆ្នាំ ជនជាតិខ្មែរ មុខរបរបុគ្គលិក អ៊ិនធើណេត បម្រើការនៅកន្លែងកើតហតុ មានទីលំនៅបច្ចុប្បន្នភូមិស្តុក ឃុំស្តុក ស្រុកគងពិសី ខេត្តកំពង់ស្ពឺ ដែលត្រូវចំនួន១២កាំបិត ក្នុងនោះចំលើចិញ្ចើមខាងឆ្វេង១កាំបិត ក្រោម និងលើដោះខាងស្តាំ៣កាំបិត រយះបាតដៃខាងឆ្វេង១កាំបិត និងចំខ្នងពីក្រោយ៧កាំបិត បណ្តាលឱ្យស្លាប់ភ្លាមៗមួយរំពេចនៅក្នុងបន្ទប់ទឹក។
លោកបានបញ្ជាក់បន្ថែមទៀតថា ជនសង្ស័យបានសារភាពនៅចំពោះមុខសមត្ថកិច្ចកងរាជអាវុធហត្ថខេត្តយើងថា ខ្លួនពិតជាបានយកកាំបិតមកចាក់សម្លាប់ជនរងគ្រោះ ដែលជាមេការគ្រប់គ្រង អ៊ិនធឺណែត នៅក្នុងបន្ទប់ទឹកពិតប្រាកដមែន។ បច្ចុប្បន្នជនសង្ស័យត្រូវបានកម្លាំងការិយាល័យកងរាជអាវុធហត្ថខេត្តបញ្ជូនទៅប្រគល់ឱ្យកងរាជអាវុធហត្ថខេត្តកណ្តាល នៅវេលាម៉ោងជិត៧យប់ ថ្ងៃទី៣ ខែកក្កដា ឆ្នាំ២០១៧ ដើម្បីចាត់ការបន្តទៅតាមផ្លូវច្បាប់៕
