សាកសពមនុស្សជាង១០០នាក់ត្រូវបានរកឃើញនៅក្រោមផ្ទាំងទឹកកក
សារព័ត៌មាន Cambodia News/
អាហ្វហ្គានីស្ថាន (០៦ កុម្ភៈ ២០១៧) ៖ ក្រុមមន្ត្រីអាហ្វហ្គានីស្ថានបានឱ្យដឹងថា សាកសពមនុស្សចំនួនជាង១០០នាក់ហើយ ត្រូវបានរកឃើញ ខណៈចំនួនអ្នកស្លាប់ត្រូវបានគេរំពឹងថា អាចនឹងមានច្រើនជាងនេះបន្ទាប់គ្រោះថ្នាក់បាក់ផ្ទាំងទឹកកកសង្កត់ជាបន្តបន្ទាប់។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃចន្ទ ទី០៦ ខែកុម្ភៈ ឆ្នាំ២០១៧។
ករណីនេះបានកើតឡើងបន្ទាប់ពីមានព្រិលធ្លាក់យ៉ាងសន្ធាប់នារយៈពេលប៉ុន្មានថ្ងៃចុងក្រោយនេះ ដោយវាបានបំផ្លាញផ្ទះជាច្រើនខ្នង រីឯផ្លូវជាច្រើនមិនអាចធ្វើដំណើរបាន ជាពិសេសគឺនៅតំបន់ភាគកណ្ដាល និងភាគឦសាននៃប្រទេសអាហ្វហ្គានីស្ថាន។
អ្នកនាំពាក្យក្រសួងគ្រប់គ្រងគ្រោះមហន្តរាយអាហ្វហ្គានីស្ថាន លោក Mohammad Omar Mohammadi បានថ្លែងថា សាកសពមនុស្ស៥០នាក់ត្រូវបានគេរកឃើញនៅក្នុងភូមិចំនួនពីរនៃស្រុក Bargmatal ស្ថិតក្នុងខេត្ត Nuristan និងមនុស្ស៥៤នាក់ ក៏ត្រូវបានគេរាយការណ៍ថា បាត់បង់ជីវិតផងដែរ នៅតំបន់ភាគកណ្ដាល និងភាគឦសានជាទីដែលអាជ្ញាធរបានអះអាងថា ផ្ទះ១៦៨ខ្នងត្រូវបានបំផ្លាញ ហើយ សត្វពាហនៈរាប់រយក្បាលបានងាប់៕
