មនុស្ស ១៨នាក់ស្លាប់ក្នុងការរញ្ជួយដីភាគខាងជើងប្រទេសឥណ្ឌូនេស៊ី
សារព័ត៌មាន Cambodia News/
ឥណ្ឌូនេស៊ី (០៧ ធ្នូ ២០១៦) ៖ ទីភ្នាក់ងារគ្រប់គ្រងគ្រោះមហន្តរាយជាតិ (BNPB) បាននិយាយថា អគាររាប់សិបបានបាក់រលំ និងមនុស្សយ៉ាងហោច ១៨បានស្លាប់ និងមួយចំនួនទៀតរងរបួសនៅព្រឹកថ្ងៃពុធនេះ ក្បែរខេត្តអាឆេលើកោះស៊ូម៉ាត្រាភាគខាងជើងប្រទេសឥណ្ឌូនេស៊ី បន្ទាប់ពីការរញ្ជួយដីកម្រិត ៦,៤រ៉ិកទ័រវាយប្រហារប្រទេសនេះទាំងព្រឹកព្រលឹម។
លោក ម៉ូលយ៉ាឌី អនុប្រធានឃុំពីឌីចាយ៉ាដែលជាតំបន់រងការវាយប្រហារ ដោយការរញ្ជួយខ្លាំងក្លាជាងគេបំផុតបានប្រាប់សារព័ត៌មាន AFP ថា យោងតាមទិន្នន័យពីមន្ទីរពេទ្យមនុស្ស ១៨នាក់ស្លាប់មួយចំនួនពួកគេជាកុមារ។
គួររម្លឹកថា តំបន់នេះធ្លាប់បានទទួលរងការបំផ្លិចបំផ្លាញយ៉ាងធំសម្បើមក្នុងឆ្នាំ២០០៤ នៅពេលរញ្ជួយដីកម្រិត ៩,២រ៉ិកទ័របង្កើតឲ្យមានរលកយក្សស៊ូណាមិ គ្របដណ្ដប់ពេញទូទាំងសហគមន៍នានាក្នុងប្រទេសឥណ្ឌូនេស៊ី និងបណ្ដាប្រទេសផ្សេងទៀតជុំវិញមហាសមុទ្រឥណ្ឌា។ប្រទេសឥណ្ឌូនេស៊ីត្រូវបានរងការវាយប្រហារធ្ងន់ធ្ងរជាងគេបំផុត ដែលធ្វើឲ្យមនុស្សជាង ១២ម៉ឺននាក់ស្លាប់គ្រាន់តែនៅក្នុងខេត្តអាឆេមួយតែប៉ុណ្ណោះ៕
