សម្តេចតេជោ ផ្តល់ទីតាំងរមណីយដ្ឋានវត្តភ្នំសម្រាប់ក្រុមពិការសម្តែងសិល្បៈរកកម្រៃ
សារព័ត៌មាន Cambodia News/
ភ្នំពេញ (០៦ ធ្នូ ២០១៦) ៖ បន្ទាប់ពីបានទៅចូលរួមក្នុងទិវាជនពិការកម្ពុជាទី១៨ និងទិវាជនពិការអន្តរជាតិលើកទី៣៤ នៅមជ្ឈមណ្ឌលពិព័រណ៍និងសន្និបាតកោះពេជ្រ នៅព្រឹកថ្ងៃទី០៦ ខែធ្នូ ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសរសេរបង្ហោះក្នុងទំព័រហ្វេសប៊ុកផ្ទាល់របស់សម្តេចថា”ដើម្បីសម្រួលដល់ជីវភាពជនពិការ ខ្ញុំសម្រេចផ្តល់ទីតាំងរមណីយដ្ឋាន ”វត្តភ្នំ”
ដែលមានសន្តិសុខល្អសម្រាប់ក្រុមពិការមានឱកាសសម្តែងសិល្បៈនៅក្នុងរាជធានីភ្នំពេញ។ ខ្ញុំសូមអំពាវនាវបងប្អូន កូនក្មួយពិការកុំទៅសម្តែងនៅតាមដងផ្លូវឬនៅក្នុងទីផ្សារតូចចង្អៀត ដែលអាចបង្កបញ្ហាសណ្តាប់ធ្នាប់ និងគ្រោះថ្នាក់ចរាចរណ៍ផ្សេងៗ”។
សម្តេចបានបន្ថែមថា”ក្មួយៗពិការមិនត្រូវបណ្តោយខ្លួនអោយក្លាយជាឧបករណ៌អាជីវកម្មរបស់អ្នកនៅពីក្រោយខ្នងឡើយ។សូមក្មួយៗពិការរួមគ្នា ខ្ញុំនឹងជួយទំនុកបម្រុងឧបករណ៍តន្ត្រីអោយបានល្អសមរម្យដល់ក្មួយៗសម្រាប់សម្តែង។
ខ្ញុំសូមអរគុណក្រសួងស្ថាប័នពាក់ព័ន្ឋទាំងអស់ ព្រមទាំងដៃគូអភិវឌ្ឍន៍ទាំងអស់ រួមទាំងអង្គការ សមាគម និងវិស័យឯកជននានាដែលបានរួមចំណែកលើកស្ទួយ និងអភិវឌ្ឍន៍ជនពិការ។ ទន្ទឹមនឹងនេះ សូមបណ្តាញសារព័ត៌មានជួយផ្សព្វផ្សាយអំពីជនពិការអោយបានទូលំទូលាយរួមទាំងដាក់អក្សរសញ្ញានៅលើកញ្ចក់ទូរទស្សន៍ជាដើម”៕
