ការផ្ទេរសិទ្ធិកាន់កាប់ដីដើម្បីបង្កើតទូរទស្សន៍ព្រះអាទិត្យនឹងបញ្ចប់នៅសប្តាហ៍នេះ
សារព័ត៌មាន Cambodia News/
ភ្នំពេញ (១៨ មករា ២០១៦) ៖ ដំណើរការផ្ទេរសិទ្ធិកាន់កាប់ដីសម្រាប់សាងសង់ទូរទស្សន៍ព្រះអាទិត្យ នឹងបញ្ចប់យ៉ាងយូរ នៅក្នុងសប្តាហ៍នេះ។ បន្ទាប់ពីទទួលបានសិទ្ធិស្របច្បាប់នៅក្នុងការកាន់កាប់ដីហើយ គណបក្សសង្គ្រោះជាតិនឹងអនុវត្តទៅតាមផែនការដែលមានជាបន្តបន្ទាប់ មានដូចជាការស្នើសុំច្បាប់ដាក់អង់តែនទូរទស្សន៍ជាដើម។
នេះបើតាមការអះអាងពីលោកតុ វ៉ាន់ចាន់ ថ្នាក់ដឹកនាំជាន់ខ្ពស់ទទួលបន្ទុកជំរុញដំណើរការទូរទស្សន៍ ព្រះអាទិត្យ របស់គណបក្សសង្គ្រោះជាតិ។
សូមបញ្ជាក់ថា គណបក្សសង្គ្រោះជាតិ បានចាប់ផ្តើមប្រមូលថវិកាចាប់តាំងពីថ្ងៃទី២៥ ខែមិថុនា ឆ្នាំ២០១៥ ដើម្បីបង្កើតទូរទស្សន៍ព្រះអាទិត្យ ។ ហើយរហូតមកដល់ពេលនេះ គណបក្សប្រមូលថវិកាបានប្រមាណជាង៨០ម៉ឺនដុល្លារហើយ។ បើតាមគម្រោង គណបក្សត្រូវការថវិកាប្រមាណជា ១លានដុល្លារកន្លះ ទៅ៣លានដុល្លារ ដើម្បីដំណើរការទូរទស្សន៍របស់ខ្លួន៕
