ការដ្ឋានស្ពានអាកាសតិចណូ កំណាត់ទី៣ នឹងប៉ះពាល់ការធ្វើចរាចរ ៤៥ថ្ងៃ
សារព័ត៌មាន Cambodia News/
ភ្នំពេញ (១៥ កញ្ញា ២០១៥) ៖ អាជ្ញាធរសាលារាជធានីភ្នំពេញ បានផ្សព្វផ្សាយថា កន្លងមក ស្ពានអាកាសតិចណូ បានចាក់បេតុង កម្រាលស្ពានចំនួន ២ កំណាត់រួចហើយ ប្រវែង ១០០ ម៉ែត្រ ទទឹង ១៥,៨ ម៉ែត្រ ក្នុងខណៈពេលនេះ ការដ្ឋានឈានដល់ដំណាក់កាល នៃការរៀបចំការងារ ចាក់បេតុងកំណាត់ទី៣ មានប្រវែង ៩០ ម៉ែត្រ ទទឹង ១៥,៨ ម៉ែត្រ ដែលមានទីតាំងស្ថិត នៅចំណុចកណ្តាល នៃស្ពានហើយជាចំណុចប្រសព្វ នៃមហាវិថីសហព័ន្ធរុស្ស៊ី និងមហាវិថីម៉ៅសេទុង-គីមអីលស៊ុង។
អាជ្ញាធរសាលារាជធានីភ្នំពេញ ស្នើសុំការយោគយល់ អធ្យាស្រ័យ ចំពោះការរៀបចំ ជើងសសរទម្រពុម្ពតួស្ពាន ចំនួន ៥ជួរ ស្មើនឹង ៤ប្រឡោះ កាត់ទទឹងមហាវិថី ម៉ៅសេទុង-គីមអ៊ីលស៊ុង ដែលប៉ះពាល់ដល់ ការធ្វើចរាចរ ចំនួន ៤៥ថ្ងៃ។ ផុតរយៈពេលនេះ ការដ្ឋាន នឹងបើកឲ្យការធ្វើចរាចរ ជាប្រក្រតីវិញ ហើយក៏ដាក់ឲ្យប្រព័ន្ធចរាចរថ្មី ដែលល្អប្រសើរ ជាងមុនផងដែរ។
ជាមួយគ្នានេះ អាជ្ញាធរសាលារាជធានីភ្នំពេញ បានណែនាំថា៖ ១-ការធ្វើចរាចរយានយន្ត ត្រូវគោរពដូចស្ថានភាពបច្ចុប្បន្នដដែល លើកលែងតែរថយន្តធំ ត្រូវហាមបត់ឆ្វេង ពីមហាវិថីសហព័ន្ធរុស្ស៊ី ទៅមហាវិថីគីមអ៊ីលស៊ុង។ ២-ត្រូវបើកបរគោរពស្លាកសញាចរាចរ និងហាមដឹកសំពីងសំពោង លើសពីកំពស់ ៤,២ ម៉ែត្រ ខាងក្រោមពុម្ពស្ពាន។ ៣-ដើម្បីសុវត្ថិភាព ការដ្ឋាន នឹងបិទមួយផ្នែក នៅពេលយប់ចំណុចក្រោមស្ពាន ក្នុងពេលតម្លើងពុម្ព ឆ្លងកាត់ផ្លូវ៕
