សារព័ត៌មាន Cambodia News/
ថៃ (០១ មេសា ២០១៤) ៖ នាយករដ្ឋមន្ត្រីថៃ លោកស្រី យ៉ីងឡាក់ ស៊ីនណាវ៉ាត្រា កាលពីថ្ងៃចន្ទកន្លងទៅនេះបាន ឆ្លើយតបសំណួរក្នុង តុលាការ ចំពោះមុខមន្ត្រីប្រឆាំងអំពើពុករលួយ ទាក់ទងនឹងការចោទប្រកាន់ពី បទធ្វេសប្រហែសក្នុងការងារ ដែលបញ្ហានេះអាចនាំឲ្យលោកស្រីធ្លាក់ចេញពីដំណែង ព្រមទាំងប្រឈមមុខនឹងការហាមឃាត់មិនឲ្យចូលរួម ក្នុងឆាកនយោបាយទៀតផង។
ភ្នាក់ងារសារព័ត៌មាន Channel News Asia ចុះថ្ងៃទី០១ ខែមេសា ឆ្នាំ២០១៤នេះបានឲ្យដឹងថា លោកស្រី យ៉ីងឡាក់ បានធ្វើដំណើរមកដល់គណៈកម្មាធិការជាតិប្រឆាំងអំពើពុករលួយ ដែលហៅកាត់ថា NACC នៅក្នុងទីក្រុងបាងកក កាលពីថ្ងៃចន្ទកន្លងទៅនេះ ប៉ុន្តែលោកស្រីមិនបានផ្តល់បទសម្ភាសន៍ណាមួយ ឡើយក្នុងពេលលោកស្រី ចូលទៅក្នុងស្ថាប័ន និងក្រោយពេលលោកស្រីចាកចេញមកក្រៅវិញ។ នេះបើយោង តាមសេចក្តីរាយការណ៍របស់ភ្នាក់ងារសារព័ត៌មាន AFP។
គួររំលឹកថា លោកស្រីត្រូវបានកោះហៅសួរចម្លើយក្នុងការចោទប្រកាន់មួយ ទាក់ទងនឹងគម្រោងនៃការជួយ ឧបត្ថម្ភ តម្លៃស្រូវអង្កររបស់កសិករ តាមរយៈការផ្តល់ការចំណាយទៅលើថ្លៃផលិតផលកសិកម្ម ឲ្យមាន តម្លៃខ្ពស់ជាងទីផ្សារ៕
