សាលារាជធានីភ្នំពេញនឹងកោះប្រជុំបន្ទាន់លើបញ្ហាទារភាស៊ីតាមផ្សារ
សារព័ត៌មាន Cambodia News/
ភ្នំពេញ(០៥ មីនា ២០១៤) ៖ នៅថ្ងៃទី០៥ មីនា នេះ លោកឡុង ឌីម៉ង់ អ្នកនាំពាក្យសាលារាជធានីភ្នំពេញបានឲ្យដឹងថា អភិបាលរាជធានីភ្នំពេញ លោកប៉ា សុជាតិវង្ស នឹងបើកកិច្ចប្រជុំមួយទាក់ទងនឹងបញ្ហាមួយចំនួននៃការទារភាស៊ីតាម ផ្សារ។
លោក ឡុង ឌីម៉ង បានបន្ដទៀតថា ក្នុងកិច្ចប្រជុំនេះគឺ សាលារាជធានីភ្នំពេញ នឹងរៀបចំផែនការថ្មី ដើម្បីចាត់វិធានការពង្រឹងសណ្ដាប់ធ្នាប់ទៅលើការទារភាស៊ីតាមផ្សារ ឲ្យបានត្រឹមត្រូវឡើងវិញតាមសៀវភៅបន្ទុកដែលបានចែង។
ចំពោះ បញ្ហានៃការទារភាស៊ីតាមផ្សារនេះ សាលារាជធានីភ្នំពេញ ធ្លាប់បានប្រកាសដល់អ្នកទារភាស៊ី ក៍ដូចជាអ្នកកិបសំបុត្រកង់-ម៉ូតូម្ដងរួចមកហើយដោយឲ្យពួកគេ ទាំងនោះធ្វើការអនុវត្តតាមសៀវភៅបន្ទុកដែលបានចែង។ ប៉ុន្ដែជាការកត់សម្គាល់នោះ គេសង្កេតឃើញថា អ្នកប្រកបរបរទារភាស៊ី និងកិបសំបុត្រកង់-ម៉ូតូ តាមផ្សារទាំងនោះមិនបានអនុវត្ត តាមការប្រកាសរបស់សាលារាជធានីភ្នំពេញឡើយ។
ចំពោះអ្នកដែលមិន បានអនុវត្ត តាមការប្រកាសរបស់សាលារាជធានីភ្នំពេញនេះ ត្រូវបានសាលារាជធានីភ្នំពេញ ចាប់បានចំនួន៣ករណីមកហើយ ដើម្បីយកមកព្រមាន ហើយបើនៅតែមិនអនុវត្តតាមទៀតនោះ សាលារាជធានីភ្នំពេញនឹងបញ្ឍប់មុខរបរពួកគេតែម្ដង។ នេះបើតាមការបញ្ជាក់របស់លោកឡុង ឌីម៉ង់អ្នកនាំពាក្យសាលារាជធានីភ្នំពេញ៕
