រថយន្ត ២គ្រឿងបុកគ្នា នៅផ្លូវជាតិលេខ៤ សា្លប់ ៣នាក់ របួសធ្ងន់ និងស្រាល១០នាក់
សារព័ត៌មាន Cambodia News/
ព្រះសីហនុ(០៣ កុម្ភៈ ២០១៤) ៖ កាលពីវេលាម៉ោង ១១ និង៥០នាទីព្រឹក ថ្ងៃទី២ ខែកុម្ភៈ ត្រង់ចន្លោះគីឡូម៉ែត្រលេខ ១៤៧-១៤៨ ស្ថិតក្នុងភូមិគីរីវន្ត័ ឃុំស្ទឹងឆាយ ស្រុកកំពង់សិលា ខេត្តព្រះសីហនុ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយ បានកើតឡើង បណ្តាលឲ្យមនុស្សប្រុសស្រីចំនួន ៣ នាក់បានស្លាប់នៅនិងកន្លែង និង១០នាក់ទៀត កំពុងរបួសធ្ងន់និងស្រាល ដោយសាររថយន្តតូចពីរគ្រឿង បានបើកបញ្ច្រាសទិសគ្នា បុកគ្នាយ៉ាងពេញទំហឹង លើដងផ្លូវជាតិលេខ៤។
សាក្សី នៅកន្លែងកើតហេតុ បាននិយាយថា រថយន្តកាមរីហាយព្រីក ពណ៌ស ពាក់ស្លាកលេខ 2U 6788 មានទិសដៅពីភ្នំពេញ មកក្រុងព្រះសីហនុ បានបុកជាមួយរថយន្តម៉ាកតូយ៉ូតា សាយអន ពណ៌ឈាមជ្រូក ពាក់ស្លាកលេខ 2L 4591 បណ្តាលរថយន្ត
តូយ៉ូតាមួយនេះ ក្រឡាប់ធ្លាក់ថ្នល់ ធ្វើឲ្យមនុស្សជិះក្នុងរថយន្តសាយអន នោះ ស្លាប់ ៣នាក់ភ្លាមៗនៅនិងកន្លែង (ស្រី២ប្រុស១) និង៤នាក់ទៀតរបួសធ្ងន់ស្រាល។ ដោយឡែកអ្នកជិះក្នុងរថយន្តកាមរី ហាយព្រីក ដែលបុកគេនោះ ពុំមានអ្នកស្លាប់ទេ ដោយគ្រាន់តែរបួសធ្ងន់និងស្រាល៦នាក់។
មន្ត្រីប៉ូលិសចរាចរណ៍ ផ្លូវគោកស្រុកកំពង់សិលា ខេត្តព្រះសីហនុ បានឲ្យដឹងថា ក្នុងករណីនេះមិនទាន់ដឹងថា ភាគីណាមួយខុសនោះទេ កំពុងស្រាវជ្រាវ និងសង្គ្រោះជនរងគ្រោះដឹកបញ្ជូនទៅកាន់មន្ទីរពេទ្យបង្អែកស្រុកស្រែ អំបិល៕
