សាលាមត្តេយ្យជប៉ុនមួយ ត្រូវសង១លាន៣សែនអឺរ៉ូដល់គ្រួសារដែលបាត់បង់កូន៤នាក់ក្នុងរលកយក្ខស៊ូណាមី
នៅថ្ងៃ អង្គារនេះ តុលាការជប៉ុនបានសំរេចកាត់ក្តី អោយនាយកសាលានិងសាលាមត្តេយ្យជប៉ុនមួយកន្លែង ចេញសងជំងឺចិត្តជាទឹកប្រាក់១លាន៣សែនអឺរ៉ូ ដល់គ្រួសារមួយដែលបានបាត់បង់កូន៤នាក់ ក្នុងមហន្តរាយនៃរលកយក្ខស៊ូណាមី កាលពីឆ្នាំ២០១១។ នៅថ្ងៃនៃគ្រោះមហន្តរាយនោះ នាយកសាលាបានប្រាប់អោយរថយន្តដឹកសិស្សចេញពីសាលាមត្តេយ្យ បើទោះជាដឹងថាដីកំពុងតែរញ្ជួយខ្លាំងក៏ដោយ។
ចៅក្រម តុលាការទីក្រុងសេនដៃ ប្រទេសជប៉ុន បានសំរេចអោយនាយកសាលា និងសាលាមេត្តយ្យនោះសងជំងឺចិត្ត មួយលានបីសែនអឺរ៉ូ ដល់ឳពុកម្តាយកុមារទាំង៤នាក់ ដែលស្លាប់បាត់បង់ជីវិត ក្នុងរលកយក្ខស៊ូណាមី ឆ្នាំ២០១១។ តុលាការលើកហេតុផលថា ថ្វីដ្បិតតែគេមិនអាចដឹងបានជាមុននូវគ្រោះរញ្ជួយដីនានា ដែលនឹងត្រូវកើតឡើងក្តី តែនាយកសាលានោះ បានអនុញ្ញាតអោយរថយន្តដឹកសិស្សសាលា ចាកចេញពីសាលាបរទៅតាមផ្លូវ ដែលស្ថិតនៅបណ្តោយសមុទ្រ។ ហើយបើទោះជានៅពេលនោះ គ្រប់គ្នាសុទ្ធតែបានដឹងហើយថា ដីកំពុងតែរញ្ជួយខ្លាំង។ តុលាការលើកឡើងថា នាយកសាលាមត្តេយ្យនោះមានកាតព្វកិច្ចស្តាប់ព័ត៌មានតាមវិទ្យុ និងការប្រកាសតាមមេក្រូផ្សេងៗ មុននឹងសំរេចអោយរថយន្តចាកចេញពីសាលា។
នៅទីបញ្ចប់ គឺគឺកុមារ៤នាក់ ជាបងប្អូននឹងគ្នា ត្រូវបានរលកយក្ខស៊ូណាមី ត្របាក់អាយុជីវិតទៅ។ សំរាប់តុលាការជប៉ុន គឺនាយកសាលាសុទ្ធសាធជាអ្នកទទួលខុសត្រូវក្នុងហេតុការណ៍នោះ។
សាលាមតេ្តយ្យរបស់កុមារទាំង៤នាក់ដែលបាត់បង់ជីវិតនោះ មានឈ្មោះថា ហ៊ីយ៉ូរី នៅនៅភាគខាងជើងប្រទេស ក្នុងក្រុងអ៊ីស្ហ៊ីណូម៉ាគី ដែលសំបូរមនុស្សស្លាប់ច្រើនក្នុងគ្រោះស៊ូណាមីនោះ។ ជាសរុប កាលណោះមានកុមារ៥នាក់ នៃសាលាមត្តេយ្យ ហ៊ីយ៉ូរី ស្ថិតក្នុងរថយន្តដែលរងគ្រោះដោយរលកយក្ខស៊ូណាមី។ ឳពុកម្តាយកុមារទាំង៤នាក់ បានដាក់ពាក្យប្តឹង ព្រោះថា វាមិនសមហេតុផលទាល់តែសោះ ដែលរថយន្តដឹកកូនៗរបស់ខ្លួនបានចាកចេញពីសាលា ពេលគ្រោះរញ្ជួយដីកើតមានរួចទៅហើយ។ ពិសេសទៀតនោះ សាលារៀនទៀតសោត ស្ថិតក្នុងតំបន់ខ្ពង់រាប ហើយមិនបានរងគ្រោះដោយរលកយក្ខនោះសោះឡើយ៕ដោយ ព្រំ សឿន សូលីណា (RFI)
