លោក ហ៊ុន សែន៖ បើសិនបក្សប្រជាជនចាញ់ឆ្នោត កម្ពុជាអាចនឹងវឹកវរ
Cambodia News
ប៉ោយប៉ែត៖ នៅក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៥៩ ពីប៉ោយប៉ែត ខេត្តបន្ទាយមានជ័យ តភ្ជាប់ទៅខេត្តប៉ៃលិន នៅថ្ងៃទី២១ មិថុនា លោក នាយករដ្ឋមន្ត្រី ហ៊ុន សែន បាននិយាយអំពីប្រទេសកម្ពុជា អាចមានអស្ថិរភាពនយោបាយ ហើយប៉ះពាល់ដល់សន្តិសុខក្នុងតំបន់ផងដែរ ប្រសិនបើគណបក្សលោកចាញ់ឆ្នោតក្នុងពេលបោះឆ្នោតខាងមុខនេះ។
ក៏ប៉ុន្តែ បញ្ហានេះត្រូវបានច្រានចោលដោយគណបក្សសង្គ្រោះជាតិ លោក យ៉ែម បុញ្ញឫទ្ធិ អគ្គលេខាធិការនៃគណបក្សសង្គ្រោះជាតិ ហៅការថ្លែងសារនយោបាយរបស់លោក ហ៊ុន សែន នៅពេលនេះថា គឺជាការអស់ជម្រើស និងអស់សង្ឃឹមក្នុងការប្រកួតប្រជែង។
លោក យ៉ែម បុញ្ញឫទ្ធិ បន្តថា នេះជាមធ្យោបាយតែមួយគត់របស់លោកនាយករដ្ឋមន្ត្រី ដែលជ្រើសរើសការប្រកាសអាសន្ននៅក្នុងសង្គម ថានឹងមានអស្ថិរភាពនយោបាយ ដើម្បីគំរាមពលរដ្ឋនៅក្នុងប្រទេស។ លោកគិតថា ព្រោះអនុប្រធានគណបក្សប្រជាជនកម្ពុជា ដឹងយ៉ាងច្បាស់ថា ពលរដ្ឋកម្ពុជា ធ្លាប់ឆ្លងកាត់សង្គ្រាម និងព្រួយបារម្ភខ្លាចមានវិបត្តិជាថ្មីឡើងវិញ ទើបលោក ហ៊ុន សែន ប្រើសារគំរាមបែបនេះ។
បើទោះជាលោកនាយករដ្ឋមន្ត្រី ហ៊ុន សែន ប្រកាសថា បើគណបក្សប្រជាជនកម្ពុជា ចាញ់ឆ្នោតនឹងលុបបំបាត់គម្រោងអភិវឌ្ឍន៍នានា ដោយរួមទាំងឈប់ធ្វើបុណ្យក៏ដោយ ក៏ប៉ុន្តែលោក យ៉ែម បុញ្ញឫទ្ធិ អះអាងថា ការអភិវឌ្ឍជាតិ គឺជាកាតព្វកិច្ចរបស់រដ្ឋាភិបាល គឺពុំមែនជារឿងបុគ្គលនោះទេ៕
