កងទ័ពរដ្ឋាភិបាលស៊ីរីចាប់ផ្តើមទទួលមែន កាំជ្រួចមីស្ស៊ីលរុស្ស៊ីធុន S-300
គឺកាំជ្រួចប៉ុន្មានគ្រឿងដំបូង នៃប្រព័ន្ធការពារដែនអាកាសធុន S-300 ដែលទើប បានទៅដល់ប្រទេសស៊ីរី។ ដំណឹងនេះ ចុះផ្សាយដោយកាសែតលីបង់ Al Akhbar លេខថ្ងៃ៣០ ឧសភា យោងទៅលើ បទសម្ភាសន៍ លោកប្រធានាធិបតីស៊ីរី Bachar al Assad សម្ភាសន៍ ដែលត្រូវចាក់ផ្សាយថ្ងៃនេះ ដោយកាណាល់ទូរទស្សន៍ Al Manar ស្និទ្ធនឹង Hezbollah ជា ចលនាអ៊ីស្លាមនិកាយShiit នៅប្រទេសលីបង់ច្បាំងនៅខាង របបក្រុងដាម៉ាស។
បញ្ហាលក់អាវុធនេះរបស់រុស្ស៊ី ទៅឲ្យរបបលោកប្រធានាធិបតី ស៊ីរី គឺញ៉ាំងឲ្យមាន ការ ទិតៀនយ៉ាងខ្លាំង ពីខាង ស.រ.អា. និង សម្ព័ន្ធមិត្តដ៏ជំនិតរបស់អាមេរិក នៅតំបន់ដើមបូព៌ា ពោលគឺ អ៊ីស្រាអែល ដែលនៅជាប់ផ្ទាល់នឹងដែនដីស៊ីរី។ មកពីមូលហេតុនេះ បានជា កាលពីថ្ងៃ ១៤ឧសភា កន្លងទៅ លោកនាយករដ្ឋមន្ត្រីអ៊ីស្រាអែល Benjamin Netanyahu ថែមទាំងបាន មកជួបចរចាជាបន្ទាន់ ជាមួយលោកប្រធានាធិបតីរុស្ស៊ីពូទីន ទៅផង ដើម្បីទទូច ក្រុងម៉ូស្គូ កុំលក់អាវុធនេះ ទៅស៊ីរី។ ប៉ុន្តែ រុស្ស៊ីមិនកែប្រែគោលជំហរខ្លួន ឡើយ ក្នុងបញ្ហា ដ៏ចម្រូងចម្រាសនេះ។
លោករដ្ឋមន្ត្រីការបរទេសរុស្ស៊ី Serguei Lavrov តែងគូសបញ្ជាក់ថា ប្រព័ន្ធកាំជ្រួច S-300 ដែលរុស្ស៊ីលក់នេះ ឥតបំពានលើ បទដ្ឋានអន្តរជាតិឡើយ ដ្បិត វាជាអាវុធសម្រាប់តែការពារប៉ុណ្ណោះ និយាយឲ្យចំ គឺសម្រាប់ ការពារដែនអាកាសស៊ីរី មិនមែនសម្រាប់វាយប្រហារទៅលើ ពួកឧទ្ទាម ដែលប្រឆាំងនឹងរដ្ឋាភិបាលក្រុងដាម៉ាស ឡើយ បានន័យថា វាក៏មិនរំលោភលើ បម្រាមហាម មិនឲ្យផ្តល់ អាវុធទៅស៊ីរី ដែលធ្លាប់បានចេញដោយ សហភាពអឺរ៉ុប និងស.រ.អា.។
ឥឡូវ ក្រោយពីសហភាពអឺរ៉ុប បានលុបទៅវិញបម្រាមនោះ ហើយឲ្យភ្លើងខៀវ ទៅប្រទេសណា ជាសមាជិកខ្លួន ឲ្យអាចផ្តល់អាវុធទៅក្រុមប្រឆាំង នៅស៊ីរីទៅតាមការយល់ឃើញរបស់គេ ម៉ូស្គូ ថ្លែងចោទប្រកាន់ទង្វើសហភាពនេះ ថា អាចនាំឲ្យខូចការ ដល់សន្និសីទអន្តរជាតិមួយលើកថ្មី ស្តីអំពីប្រទេសស៊ីរី ដែលគ្រោងប្រព្រឹត្តទៅ ក្នុងក្រុងហ្ស៊ឺណែវ នៅខែមិថុនាខាងមុខ ស្របនឹង សំណើរួម រុស្ស៊ី-អាមេរិក ក្រោមឈ្មោះថា “ ហ្ស៊ឺណែវ-ទី២”។
កុងត្រា ដែលប្រមើលលក់ទៅឲ្យស៊ីរី នូវប្រព័ន្ធការពារដែនអាកាសរុស្ស៊ីធុន S-300 ត្រូវបានចុះ តាំងពីឆ្នាំ ២០១០ម៉្លេះ ក្នុងតម្លៃ៩០០លានដុល្លារអាមេរិក ដែលទឹកប្រាក់នេះ តាមការចុះផ្សាយ នៃកាសែតរុស្ស៊ី គឺមានផ្ទេរ ដោយរដ្ឋាភិបាលក្រុងដាម៉ាស មកឲ្យភាគីរុស្ស៊ីទៅហើយ។
កាសែតរុស្ស៊ី ឈ្មោះ Komsomolskaya Pravda ពេលថ្មីៗក្រោមចំណងជើងថា “បស្ចិមលោក មួម៉ៅ នឹងរុស្ស៊ី ដែលរំខានខ្លួន មិនឲ្យទម្លាក់គ្រាប់បែក លើស៊ីរី” លើកយកមតិពួកអ្នកជំនាញការ លោកខាងលិចផ្ទាល់ មកចុះផ្សាយថា៖ ប្រព័ន្ធS-300 នឹងទប់ស្កាត់មហិច្ឆតាកងអាកាសអូតង់ កុំ ឲ្យញ៉ាម វាយប្រហារស្រេចតែទំនើងក្បាលចិត្ត ដូចករណីប្រទេសលីប៊ីឡើយ ដ្បិតអាវុធរុស្ស៊ីនេះ ធានាកំទេច ក្នុងអាកាស គឺ តាំងពីយន្តហោះ រហូតដល់ កាំជ្រួចបណ្តែត ដែលហៅថា Cruise៕ដោយ កែវ ឆាយា (RFI)
