រថយន្តកុងតឺន័រ បុករ៉ឺម៉កដឹកត្រី បណ្តាលឲ្យម្នាក់ស្លាប់
Cambodia News
ភ្នំពេញ៖ កាលពី វេលាម៉ោង ១៤នឹង០០នាទីរសៀល ថ្ងៃទី៣ ខែឧសភា បុរសជនជាតិវៀតណាម២នាក់ ម្នាក់ ស្លាប់យ៉ាងអាណោចអាធម័នៅនឹងកន្លែងកើតហេតុ និងម្នាក់ទៀតរងរបួសធ្ងន់ ដោយសារ រថយន្តកុងតឺន័របើកបុកពេញទំហឹង នៅតាមបណ្តោយផ្លូវទំនប់កប់ស្រូវ ស្ថិតក្នុងភូមិត្រពាំងរាំង សង្កាត់ឃ្មួញ ខណ្ឌសែនសុខ។
ជនជាតិវៀតណាមម្នាក់ ដែលស្លាប់ក្នុងហេតុការណ៍គ្រោះថ្នាក់ខាងលើនេះ ឈ្មោះ ភើន អាយុ៣០ឆ្នាំ មុខរបរដឹកត្រីឲ្យម៉ូយ និងម្នាក់ទៀតជាជនជាតិខ្មែរ ឈ្មោះ ឡូម អាយុ២០ឆ្នាំ មុខរបរជាអ្នកដឹកត្រីដូចគ្នា រងរបួសធ្ងន់។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញ បុរសរងគ្រោះពីរនាក់ខាងលើនេះ ជិះរ៉ឺម៉កម៉ូតូដឹកត្រី តាមបណ្តោយផ្លូវទំនប់ទឹក ក្នុងទិសដៅពីលិចទៅកើត ដោយល្បឿនយ៉ាងលឿន ខណៈបើកមកដល់ចំណុចកើតហេតុខាងលើ រ៉ឺម៉កម៉ូតូ ដឹកត្រីបានជ្រុលចង្កូតចូលទៅផ្លូវខាងឆ្វេងដៃ ក៏បុកគ្នាជាមួយរថយន្តកុងតឺន័រ ពណ៌ស ពាក់ស្លាកលេខ ភ្នំពេញ 3B-8935 ដែលបើកបរ បញ្រ្ចាសទិស នឹងលឿនដូចគ្នា លាន់សូប្រាវ បណ្តាលឲ្យស្លាប់ម្នាក់ និងម្នាក់ទៀតរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ ។
ក្រោយពីកើតហេតុ សមត្ថកិច្ចនគរបាលមូលដ្ឋាន និងនគរបាលចរាចរ បានចុះមកអន្តរាគមន៍វាស់វែង ស្ទូចយករថយន្តបង្ក និងររ៉ឺម៉ក ទៅរក្សាទុកនៅអធិការដ្ឋាននគរបាលចរាចរជើងគោករាជធានីភ្នំពេញ ដើម្បីដោះស្រាយតាមនីតិវិធីច្បាប់៕ ហេង នាង
