ចោរស្ទើរភ្លើង យកកាំភ្លើងជ័រ មកប្លន់យករថយន្ត
Cambodia News
ភ្នំពេញ៖ កាលពីវេលាម៉ោង១និង៣០នាទីរំលង អាធ្រាត្រឈានចូលថ្ងៃទី១៩ ខែមេសា ចោរស្ទើរភ្លើងម្នាក់ ត្រូវបានសមត្ថកិច្ច ឃាត់ខ្លួន បន្ទាប់ពីជនសង្ស័យម្នាក់នេះ បានយកកាំភ្លើងជ័រ ទៅធ្វើសកម្មភាពប្លន់យករថយន្ត ពីបុរសម្នាក់ នៅចំណុចជិតទីបញ្ជាការកងរាជអាវុធហត្ថផ្ទៃប្រទេស ក្នុងសង្កាត់បឹងកក់ទី២ ខណ្ឌទួលគោក។
សមត្ថកិច្ចបានឲ្យដឹងថា មុនពេលកើតហេតុ មានបុរសម្នាក់ ឈ្មោះ គង់ សុធារិទ្ធ អាយុ៣២ឆ្នាំ បានបើករថយន្តមួយគ្រឿងម៉ាក រេហ្វ័រ ពណ៌ខ្មៅ ពាក់ស្លាកលេខ ភ្នំពេញ 2B-0221 ក្នុងទិសដៅពីកើតទៅលិច លុះមកដល់ចំណុចជិតទីបញ្ជាការកងរាជអាវុធហត្ថផ្ទៃប្រទេស បុរសរូបនេះបានឈប់រថយន្តដើម្បីចុះបត់ជើងតូច ខណៈនោះស្រាប់តែជនសង្ស័យម្នាក់ ទំនងជាមិនគ្រប់ទឹក បានកាន់កាំភ្លើងជ័រពីរដើម មកធ្វើសកម្មភាពប្លន់យករថយន្ត ពីបុរសឈ្មោះ គង់ សុធារិទ្ធ បានសម្រេច រួចជនសង្ស័យបានព្យាយាមបើករថយន្តរត់គេចខ្លួន រហូតទៅដល់សង្កាត់ភ្នំពេញថ្មី ខណ្ឌសែនសុខ ក៏រេចង្កូតបុកចូលយានដ្ឋាន បណ្ដាលឲ្យរថយន្តទៅមុខលែងរួច ភ្លាមៗនោះសន្តិសុខ ដែលយាមនៅជិតកន្លែងកើតហេតុ បានស្ទុះរត់មកចាប់ជនសង្ស័យទុករងចាំសមត្ថកិច្ចមកដល់។
ក្រោយកើតហេតុសមត្ថកិច្ចក៏បាននាំខ្លួនជនសង្ស័យរួមជាមួយរថយន្តខាងលើយកទៅកាន់អធិការដ្ឋាននគរបាលខណ្ឌសែនសុខ ដើម្បីធ្វើការសាកសួរបន្ត៕ ហេង នាង
