រថយន្តបើកទៅបុក ម៉ូតូបណ្តាលឲ្យដួលរងរបួសធ្ងន់ពីរនាក់
Cambodia News
ភ្នំពេញ៖ កាលពីម៉ោង០០និង១៥នាទី រំលងអធ្រាត្រឈានចូលថ្ងៃទី០៤ ខែមេសា រថយន្តមួយគ្រឿងបើកបរដោយបុរសជនជាតិបរទេសម្នាក់ និងអ្នករួមដំណើរជាមួយស្រីម្នាក់ បានបើកទៅបុកគ្នាជាមួយ និងម៉ូតូ ជិះគ្នាពីរនាក់តាមផ្លូវលេខ៥៦៦បញ្ច្រាសទិសគ្នានៅតាមបណ្តោផ្លូវលេខ៥៦៦ សង្កាត់បឹងកក់១ ខណ្ឌទួលគោក។
តាមសាក្សីដែលឃើញហេតុការណ៍បានប្រាប់ថា នៅមុនពេលកើតហេតុ គេឃើញ ជនរងគ្រោះជិះម៉ូតូC125 ពណ៌ខ្មៅពាក់ស្លាកលេខភ្នំពេញ 1AZ-5879 ឌុបស្រីម្នាក់ពីជើងទៅត្បូងតាមបណ្តោយផ្លូវ៥៦៦ ពេលមកដល់ ចំណុចកើតហេតុខាងលើ ក៏ត្រូវរថយន្តម៉ាកកាម៉ា រីបាឡែនពណ៌សពាក់ស្លាកលេខភ្នំពេញ 2V-6705 រ៉េចង្កូតមកបុកពីចំហៀងពេញទំហឹង បណ្តាលឲ្យដួលរងរបួសធ្ងន់ទាំងពីរនាក់។
ក្រោយពេលកើតហេតុរថយន្តបង្កបានព្យាយាមបើករត់រហូតទៅដល់មុខខុន ដូឌីយ៉ាម៉ង់ ស្ថិតនៅតាមផ្លូវ៣១៥ សង្កាត់បឹងកក់២ ខណ្ឌទួលគោក រួចនាំគ្នាឡើងទៅសំងំនៅលើខុនដូបាត់ទៅ ។ បន្ទាប់មកសមត្ថកិច្ចបានទៅដល់រួចហៅជនបង្កឲ្យចូលខ្លួនមកដោះស្រាយ ។
បច្ចុប្បន្នជនរងគ្រោះត្រូវបានរថយន្តសង្គ្រោះដឹកយកទៅព្យាបាលនៅ គ្លីនិកឯកជន ចំណែកឯរថយន្តនិងម៉ូតូត្រូវបាននគរបាលចរាចរណ៍ ខណ្ឌទួលគោកយកទៅរក្សាទុក រង់ចាំការដោះស្រាយនៅពេលក្រោយ ៕ ហេង នាង
