ស្លាប់ម្នាក់ របួស ២នាក់ ដោយសារអំពើបាញ់ប្លន់យកម៉ូតូ
Cambodia News
ភ្នំពេញ៖ កាលពីវេលាម៉ោង២និង៣០នាទីទាបភ្លឺ ឈានចូលថ្ងៃទី០៤ ខែមេសា យុវជនម្នាក់បានស្លាប់បាត់បង់ជីវិត និង ២នាក់ទៀតរងរបួសក្នុងអំពើបាញ់ ប្រហារប្លន់យកម៉ូតូម៉ាកសេ១២៥ ស៊េរីឆ្នាំ២០១២មួយគ្រឿង ខណៈពេលដែលជនរងគ្រោះកំពុងអង្គុយផឹកស៊ីនៅលើសួនច្បារក្រោមស្លាកសញ្ញា បញ្ជាបង់ប្រាក់ ច្រកស្ពានលីយ៉ុងផាត់ ភូមិបាក់ខែង សង្កាត់បាក់ខែង ខណ្ឌឬស្សីកែវ។
យុវជនដែលរងគ្រោះស្លាប់បាត់បង់ជីវិតខាងលើនេះ ឈ្មោះ មុំ ភិរុន អាយុ២៦ឆ្នាំ និង២នាក់ទៀតដែលរងរបួស ទី១ឈ្មោះ ភិន ភាន អាយុ២៦ឆ្នាំ និងទី២ឈ្មោះ ឈឹម ស៊ីណា អាយុ២៥ឆ្នាម។ អ្នកទាំងបីនាក់មានទីលំនៅក្បែរកន្លែងកើតហេតុខាងលើ។
មុនពេលកើតហេតុ យុវជនរងគ្រោះទាំងអស់បាននាំគ្នាទិញប៊ីយ៉ែមកផឹកស៊ីនៅកន្លែងកើតហេតុ ខាងលើតាំងពីវេលាម៉ោង២០និង០០នាទីយប់ ថ្ងៃទី០៣ ខែមេសា ឆ្នាំ២០១៣ ដោយមានគ្នាសរុបទាំងអស់៧នាក់ លុះដល់វេលាយប់ជ្រៅរំលងអាធ្រាត្រ មនុស្ស៤នាក់ក៏បានត្រឡប់ទៅលំនៅឋានវិញអស់ ដោយឡែកជនរងគ្រោះទាំងបីនាក់ នៅអង្គុយផឹកស៊ីបន្តហើយក៏មានក្រុមចោរប្លន់ប្រដាប់អាវុធ១ក្រុម គ្នា២នាក់ បានជិះម៉ូតូមួយគ្រឿងម៉ាកសេ១២៥ ស៊េរីថ្មី ប្រដាប់ដោយអាវុធខ្លី១ដើម ម៉ាក K54 មកធ្វើសកម្មភាពភ្ជង់បាញ់ប្លន់ ពីជនរងគ្រោះយកទៅបាត់តែម្តង។ ហេង នាង
