ក្រសួងសង្គមកិច្ច ប្រារព្ធទិវា សិទ្ធិនារី អន្តរជាតិ លើកទី១០២
ភ្នំពេញ៖ នៅព្រឹកថ្ងៃទី០៦ ខែមីនា ឆ្នាំ២០១៣នេះ រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា លោក អ៊ិត សំហេង រួមនិងមន្រ្តីក្នុងក្រសួង ភាគច្រើនជាស្រ្តីបានប្រារព្ធទិវាសិទ្ធិនារីអន្តរជាតិ ៨ មីនា លើកទី១០២ ក្រោមប្រធាន បទ«សិទ្ធិស្មើគ្នា ឱកាសដូច គ្នា ដើម្បីពន្លឿនកិច្ចអភិវឌ្ឍន៍»។
ថ្លែងនៅក្នុងពិធី លោករដ្ឋមន្រ្តី អ៊ិត សំហេង បានមានប្រសាសន៍ថា ការប្រារព្ធទិវាសិទ្ធិនារីអន្តរជាតិក្នុងឆ្នាំនេះ ដើម្បី រំលឹកពីការតស៊ូរបស់នារី និងពលករទូទាំងសកល លោក ដែលបានខិតខំប្រឹងប្រែង តស៊ូទាមទារសិទ្ធិសេរីភាព សមាសភាព រវាងបុរស និងនារី ។
លោកបានបន្តថា ការប្រារព្ធទិវាសិទ្ធិនារីលើកទី១០២ របស់ក្រសួងសង្គមកិច្ច ក៏ជាសារអប់រំមួយបំផុសឲ្យ បុរសទាំងអស់ចូលរួម កាត់បន្ថយអំពើហិង្សាលើស្រ្តី និងការរំលោភបំពាន ព្រមទាំងការបំបិទនូវសិទ្ធិសេរីភាពរបស់ស្រ្តី ។
ពាក់ព័ន្ធនិងការលើកកម្ពស់សិទ្ធិស្រ្តីនៅក្នុងប្រទេសកម្ពុជានេះផងដែរ នៅពេលថ្មីនេះ ប្រទេសអូស្រ្តាលី និងសហ គមន៍អឺរ៉ុប បានផ្តល់ជំនួយរាប់លានដុល្លារ ដល់រាជរដ្ឋាភិបាល និងអង្គការសង្គមស៊ីវិលនៅកម្ពុជា ដើម្បីបំពេញបេសក កម្មបញ្ឈប់អំពើហិង្សា ក៏ដូចជាលើកកម្ពស់ស្រ្តីនៅក្នុងឆាកនយោបាយផងដែរ៕
