សាលាឧទ្ធរណ៍ចាប់ផ្តើមសើរើរឿងលើកលែងការចោទប្រកាន់លោកឈូក បណ្ឌិត
ភ្នំពេញ៖ កាលពីថ្ងៃទី ២៧ ខែកុម្ភៈ ឆ្នាំ ២០១៣ សាលាឧទ្ធរណ៍បានចាប់ផ្តើមបើកសវនាការលើបណ្តឹងទាស់របស់ព្រះរាជអាជ្ញារបស់សាលាដំបូងខេត្តស្វាយរៀងលើករណីជនជាប់ចោទឈ្មោះ ឈូក បណ្ឌិត អតីតអភិបាលក្រុងបាវិតខេត្តស្វាយរៀងដែលបានប្រើអាវុធបាញ់បង្ករបួសធ្ងន់ធ្ងរដល់កម្មការនីចំនួន៣នាក់នៅរោងចក្រកៅវេ កាលពីខែ កុម្ភៈ ឆ្នាំ ២០១២ ។
សវនាការនេះដឹកនាំលោកចៅក្រម ឃុន លាងម៉េង ប្រធានក្រុមប្រឹក្សាជំនុំជម្រះ រីឯលោក អ៊ឹម សុផាន គឺជាតំណាងអយ្យការ។ នៅក្នុងនោះក៏មានវត្តមានផងដែរ ជនជាប់ចោទ ឈូក បណ្ឌិត និងមេធាវីការពារក្តី ជនរងគ្រោះទាំងបី៣នាក់ និងមេធាវីការពារក្តី ព្រមទាំងសាក្សីដោះបន្ទុក និង ដាក់បន្ទុកដែលជាសមត្ថកិច្ចចំនួនជាង ២០នាក់។
កម្មការិនីឈ្មោះ កែវ នា អាយុ១៩ឆ្នាំ ដែលជាជនរងគ្រោះរបួសដៃខាងស្តាំបានសុំឲ្យតុលាការអនុវត្តឲ្យគាត់ (ឈូក បណ្ឌិត) ជាប់គុក ម្យ៉ាងត្រូវសងជំងឺចិត្តដល់ពួកខ្ញុំ ព្រោះបើមិនជាប់គុក ថ្ងៃមុខ ថ្ងៃក្រោយ អាងតែគាត់ធំ គាត់នៅតែធ្វើអ៊ីចឹងដដែល។
លោក ឈូក បណ្ឌិត បន្ទាប់ពីចេញពីបន្ទប់សវនាការបានដើរអមដោយ មេធាវីការពារក្តីរបស់គាត់សំដៅទៅរថយន្តទំនើបពណ៌ខ្មៅដែលមានតម្លៃ ជាង១០ម៉ឺនដុល្លារ ដែលចតរងចាំនៅក្នុងបរិវេណសាលាឧទ្ធរណ៍នោះ លោកពុំបានផ្តល់កិច្ចសម្ភាសន៏ណាមួយដល់អ្នកព័ត៌មានទេ។
លោក អំ សំអាត ប្រធានក្រុមបច្ចេកទេសស៊ើបអង្កេតរបស់អង្គការសិទ្ធិមនុស្ស លីកាដូ ដែលបានតាមឃ្លាំមើលសវនាការសម្តែងការសោកស្តាយ ហើយថា សវនាការនោះ គួរតែបើកឲ្យអ្នកផ្សេងបានស្តាប់ និងតាមដាន។ លោកក៏បានជំរុញឲ្យតុលាការសាលាឧទ្ធរណ៍ត្រូវតែផ្តល់យុត្តិធម៌ដល់ ក្រុមស្ត្រីកម្មកររងគ្រោះ។
សូបបញ្ជាក់ថានៅក្នុងសំណុំរឿងនេះ គេបានបង្វែរទម្លាក់កំហុសទៅលើមន្ត្រីនគរបាលម្នាក់ឈ្មោះ ស ចាន់ថា ថាបានបាញ់កម្មការិនីទាំង ៣នាក់ ឲ្យរបួស ហើយតុលាការខេត្ត ស្វាយរៀង បានទម្លាក់បទចោទពីលោក ឈូក បណ្ឌិត ប៉ុន្តែមន្ត្រីនគរបាលមួយចំនួនដែល ចូលរួមក្នុងព្រឹត្តការណ៏នោះពុំបានប្រព្រឹត្តអំពើបាញ់កម្មការិនី ឲ្យរបួសនោះទេ។
សវនាការនេះគឺមានដំណើរការរយៈពេល ៣ថ្ងៃ ពីថ្ងៃទី ២៧ ខែ កុម្ភៈ ដល់ថ្ងៃទី១ ខែ មិនា ឆ្នាំ ២០១៣ ដោយនឹងមានការសួរដេញដោលជនជាប់ចោទ និង សាក្សី ព្រមទាំងជនរងគ្រោះដើម្បី ពិចារណាដល់ជនរងគ្រោះទាំង ៣នាក់៕
