បុរសម្នាក់ស្លាប់ និងកុមារម្នាក់ស្ថិតក្នុងស្ថានភាពធ្ងន់ធ្ងរ ដោយសារជម្ងឺ(H5N1)
ភ្នំពេញ៖ ជម្ងឺគ្រុនផ្ដាសាយបក្សី (H5N1) បានឆក់ស្រូបយកជីវិត ពលរដ្ឋខ្មែរម្នាក់ទៀតហើយ នៅខេត្ត ប៉ៃលិន ចំ ណែកកុមារម្នាក់ ស្ថិតក្នុងស្ថានភាពធ្ងន់ធ្ងរ ដែលវាបានក្លាយ ទៅជាករណី ទី២៦ ហើយ នៃការវាយលុក ដោយជម្ងឺគ្រុនផ្ដាសាយបក្សី ក្នុងឆ្នាំ ២០១៣ នេះ ។
យោងតាមសេចក្ដីប្រកាសព័ត៌មាន រួមមួយ រវាងក្រសួងសុខាភិបាល និងអង្គការសុខភាពពិភពលោក កាលពីថ្ងៃទី ១៤ វិច្ឆិកា ម្សិលមិញថា កុមារអាយុ៣ឆ្នាំម្នាក់ រស់នៅក្នុងភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ បានឈឺ ហើយត្រូវគេបញ្ជូនមកព្យាបាលនៅមន្ទីរពេទ្យគន្ធបុប្ផា នាថ្ងៃទី៨ ខែវិច្ឆិកា ឆ្នាំ២០១៣ ដោយប្រើប្រាសឱសថ Tamiflu ។ ចំណែក បុរសអាយុ ២៩ ឆ្នាំ ម្នាក់ទៀតរស់នៅ ភូមិកូនដំរី ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានស្លាប់កាលពីថ្ងៃទី ៦ ខែ វិច្ឆិកា ។
អ្នកទាំងពីរ ដែលមានប្រវត្តិ ប៉ះពាល់ជាមួយមាន់ឈឺងាប់ ត្រូវបានវិទ្យាស្ថានប៉ាស្ទ័រ បង្ហាញលទ្ធផលឲ្យដឹង បន្ទាប់ពីយកសំណាកអ្នកជម្ងឺទៅវិភាគថា ពួកគេ មានផ្ទុកមេរោគ គ្រុនផ្ដាសាយបក្សី ឬ H5N1 ៕ Cambodia News
