ព្យុងយ៉ាងបាញ់សាកល្បងនុយក្លេអ៊ែរជាលើកទីបី នៅក្រោមដី
កូរ៉េខាងជើងបានបញ្ជាក់ព័ត៌មានអំពី ការបាញ់សាកល្បងនុយក្លេអ៊ែរជាលើកទីបី ប្រកបដោយជោគជ័យ នៅព្រឹកថ្ងៃទី ១២ កុម្ភៈឆ្នាំ២០១៣នេះ ដូចការគ្រោង។ នេះបើតាមភ្នាក់ងារព័ត៌មានផ្លូវការកូរ៉េខាងជើង KCNA ដែលបានលម្អិតថា ការបាញ់សាកល្បងលើកនេះមានកំរិតបច្ចេកវិទ្យាជាក់លាក់មួយដោយប្រើគ្រាប់នុយក្លេអ៊ែរ តូច ស្រាល តែមានកម្លាំងខ្លាំង។
ការបាញ់សាកល្បងនុយក្លេអ៊ែរកូរ៉េខាងជើងជាលើកទីបី ប្រព្រឹត្តទៅនៅម៉ោង ១១ និង៥៧នាទីព្រឹកថ្ងៃអង្គារនេះ ម៉ោងនៅទីក្រុងសេអ៊ូល ដោយស្តែងជាហេតុ ការណ៍រញ្ជួយដី បែបសម្បនិមិត្តមួយ រង្គើរញ្ជួយដឹងដល់ខេត្តចិន ជាប់នឹងព្រំដែន។
បើតាមរបាយការណ៍របស់អ្នកឯកទេសអាមេរិក និងកូរ៉េខាងត្បូង ចំណុចកណ្តាលនៃការរញ្ជួយ ដែលផ្ទុះចេញពីក្នុងដី ក្នុងជម្រៅប្រមាណ១គីឡូម៉ែត្រ ក្រោមដី គឺស្ថិតនៅត្រង់មជ្ឈមណ្ឌលពិសោធន៍នុយក្លេអ៊ែរ Punggye-ri ភាគឦសានប្រទេស។ កម្លាំងនៃរញ្ជួយ នេះមានទំហំ និងកម្លាំងស្មើនឹងការរញ្ជួយដីធម្មជាតិ ក្នុងកំរិត៤,៩ គិតតាមមាត្រដ្ឋានRichter។ នេះបើតាមការព្យាករណ៍របស់ការិយាល័យការពារការរញ្ជួយដីចិន។ ហើយបើនិយាយអំពីកម្លាំងសមត្ថភាពនៃការផ្ទុះវិញ យោធាកូរ៉េខាងត្បូងអះអាង គ្រាប់ នុយក្លេអ៊ែរដែលកូរ៉េខាងជើងបានបាញ់សាកល្បងនៅព្រឹកមិញ មានអំណាច ស្មើនឹងគ្រាប់បែករវាងពី៦ទៅ៧ គីឡូតោន ពោលគឺស្មើនឹងពាក់កណ្តាលនៃអំណាចរបស់គ្រាប់បែកបរមាណូដែលទម្លាក់ លើទីក្រុងអ៊ីរ៉ូស្ហ៊ីម៉ា ជប៉ុនក្នុងសម័យសង្គ្រាមលោកលើកទីពីរ។
បើដូចការរៀបរាប់ខាងលើជាការពិតមែន នោះបញ្ជាក់ថា កូរ៉េខាងជើងពិតជាអភិវឌ្ឍកម្មវិធីនុយក្លេអ៊ែរបានប្រសើរឡើងខ្លាំង ជាងការបាញ់សាកល្បងនុយក្លេអ៊ែរជាលើកទីមួយ និងលើកទីពីរ ២០០៦ និង២០០៩ ដែលកាលណោះគ្រាប់ផ្ទុះមានអំណាចខ្យោយជាង។
គេពុំទាន់ដឹងច្បាស់នៅឡើយទេថា តើគ្រាប់នុយក្លេអ៊ែរដែលកូរ៉េខាងជើងបាញ់លើកនេះ ជាគ្រាប់ធ្វើពីធាតុ plutonium ឬ ពី uraniumទេ ប៉ុន្តែសារព័ត៌មានផ្លូវការកូរ៉េខាងជើង បានលើកសរសើរអំពីដំណើរការបាញ់សាកល្បង តាមបច្ចេកវិទ្យាជាក់លាក់ បំផុត មួយ ដោយប្រើគ្រាប់នុយក្លេអ៊ែរដ៏តូច ស្រាល តែមានអំណាចខ្លាំង ហើយមិនផ្តល់ប៉ះពាល់ជាអវិជ្ជមាន ដល់បរិស្ថាន ក្នុងពេលភ្លាមៗឡើយ! សម្រាប់របបក្រុងព្យុង យ៉ាងនេះគឺជោគជ័យដ៏ធំធេងរបស់ខ្លួនដែលបញ្ជាក់យ៉ាងច្បាស់ថា កូរ៉េ ខាងជើងមិនចាញ់សំឡុតអាមេរិក កូរ៉េខាងត្បូង និងសម្ព័ន្ធតែមួយគត់ចិនឡើយ។
ទោះមានការហាមឃាត់ ពីសំណាក់ក្រុមប្រឹក្សាសន្តិសុខអង្គការសហប្រជាជាតិ និងមានការព្រមានពីសហគមន៍អន្តរជាតិ ជុំទិស យ៉ាងណាក៏ដោយ ក៏ព្យុង យ៉ាងធ្វើគធ្វើថ្លង់មិនឮ ហើយបានធ្វើការសាកល្បងនុយក្លេអ៊ែរជាលើកទីបី នៅថ្ងៃនេះ ដូចការប្រកាសគ្រោងទុក៕ដោយ អៀង សុខម៉ិញ (RFI)
