ក្រុមបុរសស្រលាញ់បុរសជាក្រុមដែលប្រឈមនឹងការឆ្លងអេដស៍ខ្ពស់ជាងគេ
Cambodia News
ដោយ៖ ហេង នាង
ភ្នំពេញ៖ នៅក្នុងកិច្ចប្រជុំប្រចាំត្រីមាសក្រុមការងារបច្ចេកទេសថ្នាក់ជាតិបុរស ស្រឡាញ់បុរស ដែលរៀបចំធ្វើនៅសណ្ឋាគារកាំបូឌីយ៉ាណា ព្រឹកថ្ងៃទី២៦ កញ្ញា ២០១២នេះ លោកវេជ្ជបណ្ឌិត តែង គន្ធី បានលើកឡើងថា ក្រុមបុរសស្រលាញ់បុរសត្រូវបានចាត់ទុកថា ជាក្រុមដែលកំពុងប្រឈមការឆ្លងអេដស៍ខ្ពស់ជាងគេ ក្នុងចំណោមក្រុមអ្នកបម្រើសេវាកំសាន្ត និងក្រុមអ្នកប្រើប្រាស់គ្រឿងញៀន។
លោកបានបន្តថា ចំពោះបញ្ញានេះយើងត្រូវយកចិត្តទុកដាក់ បើសិនយើងមើល រំលង ឬអនុវត្តមិនចំទិសដៅទេ វាធ្វើឲ្យមានរលកថ្មីឡើងវិញនៃការចម្លង ដែលចេញពីក្នុងចំណោមក្រុមនេះ ជាមួយនិងក្រុមស្រីបម្រើសេវាកម្សាន្ត និងក្រុមប្រើប្រាស់គ្រឿងញៀន។
តាមការវាយតម្លៃពីអាជ្ញាធរជាតិប្រយុទ្ធនឹងជំងឺអេដស៍បានឲ្យដឹងថា ជារួមអត្រាផ្ទុកមេរោគអេដស៍នៅកម្ពុជាមានការថយចុះ០.៨ ភាគរយក្នុងចំណោមប្រជាជនដែលមានអាយុពី១៥ ទៅ៤៩ឆ្នាំ បើតាមតួលេខឆ្នាំ២០១១នេះ។
ប៉ុន្តែក្នុងនោះ ស្ថានភាពគ្រោះថ្នាក់មេរោគអេដស៍រាលដាលខ្លាំង ក្នុងចំណោមក្រុមមនុស្ស ៣ ក្រុម គឺក្រុមអ្នកបម្រើសេវាកម្សាន្ត អត្រាផ្ទុកមេរោគអេដស៍មាន ១៥,២ ភាគរយ, ក្រុមបុរសស្រឡាញ់បុរស អត្រាផ្ទុកមេរោគអេដស៍មាន ៨,៧ ភាគរយ និងក្រុមអ្នកប្រើប្រាស់ថ្នាំញៀនចាក់ អត្រាផ្ទុកមេរោគអេដស៍ខ្ពស់ ២៤,៤ ភាគរយ៕
