សមត្ថកិច្ចឃាត់ខ្លួនជនសង្ស័យម្នាក់ពីបទឆក់ខ្សែក
ភ្នំពេញ៖ ជនសង្ស័យម្នាក់ត្រូវសមត្ថកិច្ចចាប់ឃាត់ខ្លួនបានភ្លាមៗ ខណៈពេលដែលរូបគេបានធ្វើសកម្មភាពឆក់ខ្សែក ប្លាទីនពណ៌សលាយក្រហម មួយខ្សែ ដែលមានទម្ងន់៦ជី មានដាំត្បូងពេជ្រគ្រាប់តូចៗ ចំនួន៦០គ្រាប់ និងមានត្បូងធំ ពណ៌បៃតងនៅចំកណ្ដាល ពីស្ត្រីម្នាក់។
ជនសង្ស័យម្នាក់ត្រូវសមត្ថកិច្ចចាប់ឃាត់ខ្លួនមាន ឈ្មោះ រិន ពុទ្ធបញ្ញារិទ្ធ ភេទប្រុស អាយុ ២១ឆ្នាំ ជនជាតិខ្មែរ មុខរបរ ជាងជួសជុលម៉ាស៊ីនត្រជាក់ចល័ត ស្នាក់នៅផ្ទះគ្មានលេខ ផ្លូវលំ ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។ ចំនែកស្ត្រីរងមានឈ្មោះតែ ចិន ភេទស្រី អាយុ ៣៨ឆ្នាំ ជនជាតិខ្មែរ មុខរបរ លក់គ្រឿងទេស ( បោះដុំ ) នៅចំណុចមុខផ្ទះលេខ១៥ ផ្លូវលេខ១៣៨ ក្រុមទី២៤បេ ភូមិ៩ សង្កាត់ផ្សារដេប៉ូទី២ ខណ្ឌទួលគោក។
នៅមុនពេលកើតហេតុ ជនរងគ្រោះឈ្មោះ តែ ចិន បានជិះម៉ូតូឌុបចេញពីផ្សារអូរឡាំពិក គោលបំណងមក ផ្ទះ , ពេលធ្វើដំណើរមកដល់ចំណុចកើតហេតុ ស្រាប់តែមានជនសង្ស័យពីរនាក់ ជិះម៉ូតូមួយគ្រឿងម៉ាក Honda Scoopy ពណ៌ស តាមមកពីក្រោយ អែបខាងស្តាំ ធ្វើសកម្មភាពឆក់ខ្សែកដែលជនរងគ្រោះកំពុងពាក់ , ភ្លាមនោះ ជនរងគ្រោះបានហក់ចុះពីលើម៉ូតូឌុប ស្ទុះទៅចាប់ទាញកអាវជនសង្ស័យឈ្មោះ រិន ពុទ្ធបញ្ញារិទ្ធ ដែលជិះខាងក្រោយ បណ្ដាលអោយធ្លាក់ពីលើម៉ូតូ ព្រមទាំងដណ្ដើមយកបន្តោងខ្សែកបានមកវិញ ជាមួយគ្នានេះដែរ កម្លាំង សមត្ថកិច្ចនគរបាលប៉ុស្តិ៍រដ្ឋបាលផ្សារដេប៉ូទី២ ដែលកំពុងល្បាតការពារសុវត្ថិភាពនៅក្នុងមូលដ្ឋាន បានអន្តរាគមន៌ ទាន់ពេលវេលា ដោយឃាត់ខ្លួនជនសង្ស័យបានភ្លាម់តែនម្តង។
បច្ចុប្បន្នជនសង្ស័យឈ្មោះ រិន ពុទ្ធបញ្ញារិទ្ធ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និង កសាងសំណុំរឿង ចាត់ការតាមផ្លូវច្បាប់ ៕ ហេង នាង
