សមត្ថកិច្ចនឹងទៅពិន័យម្ចាស់រថយន្តដល់ផ្ទះចំពោះអ្នកមិនគោរពភ្លើងស្តុប និងស្លាកសញ្ញាចរាចរណ៍
សារព័ត៌មាន Cambodia News/
ភ្នំពេញ (៤ ធ្នូ ២០១៩) ៖ ថ្លែងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក រយៈពេល១០ខែ នារសៀលថ្ងៃទី០៣ ខែធ្នូនេះ នៅទីស្តីការក្រសួងសាធារណការ និងដឹកជញ្ជូន មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិបានអះអាងថា នៅពេលខាងមុខនេះ សមត្ថកិច្ចនឹងចុះទៅចាប់ពិន័យម្ចាស់រថយន្តណាដែលបើកល្មើសភ្លើងស្តុប និងស្លាកសញ្ញាចរាចរណ៍ដល់ផ្ទះតែម្តង ។
លោកនាយកនាយឧត្តមសេនីយ៍ហ៊ឹម យ៉ាន អគ្គស្នងការរងនៃអគ្គស្នងការនគរបាលជាតិ ក្រសួងមហាផ្ទៃបានលើកឡើងថា សមត្ថកិច្ចនឹងចុះទៅចាប់ដល់រថយន្តណាដែលមិនគោរពច្បាប់ចរាចរណ៍ដែលមានដូចជា រថយន្តដែលមិនគោរពភ្លើងស្តុបក្រហមដោយបើកឆ្លងកាត់ រថយន្តដែលចតកន្លែងហាមឃាត់ជាដើម ។ ព្រោះថា នៅតាមភ្លើងស្តុបមានកាមេរ៉ា សុវត្ថិភាពបំពាក់ដោយថតបានស្លាកលេខរថយន្ត រួចហើយយទៅស្គែន ដើម្បីឆែករកឈ្មោះម្ចាស់រថយន្ត រួចហើយសមត្ថកិច្ចចុះទៅពិន័យដល់ផ្ទះតែម្តង ។
លោកនាយឧត្តមសេនីយ៍ហ៊ឹម យ៉ាន បានបញ្ជាក់ថា «ឥឡូវនេះការបំពាក់ឧបករណ៍កាមេរ៉ានៅភ្នំពេញបានប្រើប្រាស់បានល្អណាស់ ព្រោះមានការសម្រួលបច្ចេកទេសរួចហើយ ។ នៅពេលខាងមុខនេះ មានការឈានដល់ពិន័យតាមរយៈកាមេរ៉ានេះចំពោះអ្នកមិនគោរពភ្លើងសញ្ញាតាមដងផ្លូវ ភ្លើងស្តុប ។ យើងថតយកលេខយានយន្តរថយន្តបានយើងនឹងស្រាវជ្រាវរកអត្តសញ្ញាណដល់ផ្ទះ ហើយចេញប័ណ្ណពិន័យតែម្តង» ៕
