ពលរដ្ឋខ្មែរនៅថៃ មិនមានបញ្ហាអ្វី កើតឡើងនោះទេ
សារព័ត៌មាន Cambodia News/
ភ្នំពេញ ៖ នាព្រឹកថ្ងៃទី២៨ ខែឧសភា នេះ លោកកុយ គួង អ្នកនាំពាក្យ និងជាអនុរដ្ឋលេខាធិការ ក្រសួងការបរទេសកម្ពុជា បានថ្លែងឲ្យដឹងថា ប្រជាពលរដ្ឋខ្មែរ ក៏ដូចជាពលករខ្មែរដែលរស់នៅ និងធ្វើការក្នុងប្រទេសថៃ គ្មានបញ្ហាអ្វីកើតឡើងលើពួកគេឡើយ គឺពួកគេរស់នៅជាធម្មតា បន្ទាប់ពីថៃបានជួបបញ្ហាវវឹកវរ កើតឡើងនៅក្នុងប្រទេស ក្នុងគ្រាប្រទេស មួយនេះ បានប្រកាសប្រើច្បាប់អាជ្ញាសឹក។
លោកកុយ គួង បន្តថា “ ស្ថានភាព ពលករខ្មែរយើង និងពលរដ្ឋខ្មែរយើងទាំងអស់ នៅថៃ អត់មានជួបបញ្ហាអ្វីទេ ម្យ៉ាងទៀតស្ថានទូត យើងនៅបាងកក និងអគ្គកុងស៊ុលខ្មែរនៅខេត្តស្រះកែវ បានយក ចិត្តទុកដាក់ ទៅលើពួកគេជាខ្លាំង”។
លោកកុយ គួង បានបញ្ជាក់ឲ្យដឹងថា កាលពីថ្ងៃទី២៦ ខែឧសភា ស្ថានទូតកម្ពុជា នៅថៃ បានចេញសេចក្ដីជូនដំណឹង ដល់ប្រជាពលរដ្ឋខ្មែរ ដែលរស់នៅ និងរកស៊ី ក្នុងប្រទេសថៃទាំងអស់ថា បើមានបញ្ហាអ្វី មួយ អាចទំនាក់ទំនងមកលេខទូរស័ព្ទ ចំនួន ៣ខ្សែ ដើម្បីសុំជួយអន្ដរាគមន៍ភ្លាមៗ ខណៈដែលប្រទេសថៃ បានចេញច្បាប់ រឹតបន្ដឹង ក្នុងការដើរហើរ ។
ទូរស័ព្ទ ប្រចាំកាទាំង៣ខ្សែនោះ រួមមាន ទី១-០៨១ ៤៤ ១៩ ៨៧២ ទី២- ០៩៨ ៤០ ៤១ ៥៥០ និងទី៣-០៨២ ៧៩ ៩០ ០០៧ ។ ជាមួយគ្នានោះ លោកនាយករដ្ឋមន្ត្រី ហ៊ុន សែន ក៏បានអំពាវនាវ ឱ្យប្រជាពលរដ្ឋទាំងនោះត្រូវជៀសឱ្យឆ្ងាយ និងកុំចូលរួម ការជួបជុំ ណាមួយនៅក្នុងប្រទេសថៃឱ្យសោះ ៕