សម្ដេចតេជោ ហ៊ុន សែន ណែនាំឲ្យធ្វើអត្តសញ្ញាណបណ្ណជូនខ្មែរនៅក្រៅប្រទេស
និងផ្ដាំឲ្យទៅចូលរួមបោះឆ្នោតដោយផ្ទាល់នៅកម្ពុជា
សារព័ត៌មាន Cambodia News/
ថ្ងៃចេញផ្សាយៈ May 12, 2022/
ភ្នំពេញ ៖ ក្នុងឱកាសជួបសំណេះសំណាលជាមួយប្រជាពលរដ្ឋខ្មែររស់នៅអាមេរិក និងកាណាដា នាទីក្រុងវ៉ាស៉ីនតោន នៅព្រឹកថ្ងៃទី១២ ខែឧសភា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានណែនាំឲ្យសិក្សាធ្វើអត្តសញ្ញាណបណ្ណជូនប្រជាពលរដ្ឋខ្មែរដែលរស់នៅក្រៅប្រទេស ពិសេសអាមេរិក និងកាណាដាជាដើម។
សម្ដេចតេជោ ហ៊ុន សែន បានមានប្រសាសន៍បន្តថា ការធ្វើអត្តសញ្ញាណបណ្ណនេះគឺ ដើម្បីផ្ដល់ភាពងាយស្រួលដល់ពួកគាត់ ដែលចង់ទិញអចលនទ្រព្យនៅពេលត្រឡប់មកប្រទេសកំណើតវិញ នៅថ្ងៃណាមួយ ខណៈពួកគាត់មិនមានឈ្មោះក្នុងបញ្ជីនៅកម្ពុជាឡើយ។
សម្ដេចតេជោ ហ៊ុន សែន បានប្រាប់ទៅឧបនាយករដ្ឋមន្ដ្រី ប្រាក់ សុខុន រដ្ឋមន្ដ្រីក្រសួងការបរទេស និងសហប្រតិបត្តិការអន្ដរជាតិ ត្រូវធ្វើការជាមួយស្ថាប័នពាក់ព័ន្ធ ពិសេសផ្នែកអត្តសញ្ញាណកម្ម ដើម្បីសម្រួលការងារនេះ ក្រោយពីសម្ដេចបានឮពីការលំបាករបស់ប្រជាពលរដ្ឋខ្មែរអាមេរិក។
សម្ដេចតេជោ ហ៊ុន សែន ក៏បានផ្ដាំដល់ប្រជាពលរដ្ឋខ្មែរនៅក្រៅប្រទេស នៅពេលទទួលបានអត្តសញ្ញាណសញ្ជាតិខ្មែរហើយនោះ ត្រូវទៅចុះឈ្មោះបោះឆ្នោត ហើយការបោះឆ្នោតនេះទៀតសោត ត្រូវទាមទារសិទ្ធិបោះឆ្នោតដោយផ្ទាល់ មិនអាចបោះឆ្នោតតាមប្រៃសណីយនោះទេ ព្រោះជាច្បាប់បោះឆ្នោតរបស់កម្ពុជា គឺត្រូវបោះឆ្នោតផ្ទាល់៕
