ស៊ីហ្គេម ៖ ជម្រើសជាតិកម្ពុជាបុរស ឈ្នះឡាវ ៤-១ ខណៈនារី ចាញ់ហ្វីលីពីន ៥-០
សារព័ត៌មាន Cambodia News/
ថ្ងៃចេញផ្សាយៈ May 10, 2022
ភ្នំពេញ ៖ កាលពីល្ងាចមិញ ក្រុមជម្រើសជាតិកម្ពុជាក្រោមអាយុ២៣ឆ្នាំ បានយកឈ្នះក្រុម U-23 ឡាវ ដោយលទ្ធផល ៤-១ ក្នុងជំនួបបើកឆាកវគ្គសន្សំពិន្ទុពូល B នៃព្រឹត្តិការណ៍កីឡាស៊ីហ្គេមលើកទី៣១ ប្រទេសវៀតណាម នាកីឡដ្ឋាន THIEN TRUONG។
សម្រាប់ជំនួបនេះក្រុមគោព្រៃជំទង់កម្ពុជា បានបើកការនាំមុខឡាវ ២គ្រាប់មុន នៅវគ្គទី១ ដែលធ្វើសម្រេចដោយកីឡាករ សៀង ចន្ធា នៅនាទីទី៤ និងគ្រាប់ទី២ បង្កើតឱកាសបញ្ចប់ទីដោយកីឡាករ សារ ទី បន្ទាប់ពីសមាជិកក្លិបវិសាខារូបនេះ ទាត់ប៉ះអ្នកចាំទី ហើយក្រឡកទៅប៉ះជើងខ្សែការពារឡាវ Anantaza ចូលទីខ្លួនឯង នៅនាទី១៤។
ចូលវគ្គទី២ ក្រុមយុវជន U23 កម្ពុជា ដែលដឹកនាំដោយលោក Keisuke Honda បានបន្ថែម ២គ្រាប់ទៀត ពោលគឺគ្រាប់ទី៣ ធ្វើសម្រេចដោយកីឡាករ គី រីណា នៅនាទី៦៣ និងកីឡាករ អ៊ីម សំអូន នៅនាទី៧១ បន្ទាប់ពីសមាជិកក្លិបគិរីវង់រូបនេះ ប្ដូរចូលលេងបានប្រមាណ ២នាទី ។ រីឯគ្រាប់បាល់វាយបក ១គ្រាប់របស់ក្រុម U23 ឡាវ ធ្វើសម្រេចដោយកីឡាករ Phouvieng នៅនាទី៦៧។
តាមរយៈជ័យជម្នះនេះ បានធ្វើឲ្យក្រុម U23 កម្ពុជាឡើងឈរកំពូលតារាងពូល B ជាបណ្ដោះអាសន្នដោយមាន៣ពិន្ទុស្មើក្រុម U23 ម៉ាឡេស៊ី ។
ចំណែកក្រុមជម្រើសជាតិនារីកម្ពុជា បានប្រកួតចាញ់ ក្រុមហ្វីលីពិន ដោយលទ្ធផល ៥-០ ក្នុងជំនួបបើកឆាកវគ្គសន្សំពិន្ទុពូល A នៃព្រឹត្តិការណ៍កីឡាស៊ីហ្គេមលើកទី៣១ ប្រទេសវៀតណាម នាកីឡដ្ឋាន CAM PHA មុននេះបន្តិច។
សូមជម្រាបថា សម្រាប់ជំនួបបន្ទាប់ក្រុមជម្រើសជាតិកម្ពុជាក្រោមអាយុ២៣ឆ្នាំផ្នែកបុរសនឹងត្រូវប៉ះសិង្ហបុរី វេលាម៉ោង៤៖០០នាទីរសៀល ខណៈក្រុមជម្រើសជាតិនារីកម្ពុជា ប៉ះឥណ្ឌូនេស៊ី នៅថ្ងៃទី១១ ខែឧសភាដូចគ្នា វេលាម៉ោង៧៖០០នាទីយប់ ៕
